Саха сиригэр Степной Дума төрүттэммитэ 200 сылын үбүлүөйдээх сыла эһиил өрөспүүбүлүкэ таһымыгар ыытыллыаҕа. Онуоха уус алданнар бу бэлиэ даатаҕа Степной Думаны төрүттэспит Иван Емельянович Мигалкинынан быһаччы ситимнээх буоламмыт, биһиэхэ икки бэлиэ дата бэлиэтэниэҕэ. Бу тэрээһин тула улахан сүбэ мунньах Тулуна бөһүөлэгэр бүгүн, ыам ыйын 28 күнүгэр, тэрилиннэ. Василий Алексеев салалталаах элбэх киһилээх дэлэгээссийэ (дьаһалта, суол, тутуу, ДьУоКХ, культура, үөрэхтээһин тэрилтэлэриттэн) Тулунаҕа үлэлээтэ. Мунньах бэбиэскэтигэр барыта 15 боппуруос көрүлүннэ.
Туруоруллубут боппуруостарга сүрүннээн Тулуна – Бороҕон, Озернай уулусса суолларын-иистэрин тупсарыы, олохтоох хочуолунай кыамтатын күүһүрдүү, оскуола өрөмүөнүн ыытыы курдук боппуруостар көрүлүннүлэр. Мунньахха улуус кииниттэн бөһүөлэккэ кэлии суолун өрөмүөнүн ыытыы улуус өттүттэн үбүлэнэрэ, оттон нэһилиэк иһигэр сытар 1 км усталаах суол олохтоох дьаһалта бэйэтин үбүнэн оҥоһуллуохтааҕа быһаарылынна.
Ханна да буоларын курдук улууска оҕо ахсаана аҕыйыы турар. Итинник көстүү тулуналарга эмиэ сытыытык турар. Уопсайа 75 миэстэлээх уһуйааҥҥа билиҥҥи туругунан 22 эрэ оҕо сылдьар. Онон бу үлүгэр улахан саҥа таас уһуйаан күүһүн ситэри туһаммакка турар. Олохтоохтор саҥа музей, кулууп, балыыһа тутуутун туруорсубуттара ыраатта. Онуоха билиҥҥи уустук кэмҥэ саҥа тутуу ханна да ыытыллар кыаҕа суоҕун дэлэгэссийэ иһитиннэрдэ. Ол кэриэтин уһуйаан дьиэтигэр дьаһалтаны итиэннэ музейы киллэрии, оттон балыыһаны дьаһалта билиҥҥи дьиэтигэр көһөрүү ордук тоҕоостоох буолуоҕар дьаһалта өттүттэн этии киирдэ. Онуоха улуус баһылыга Василий Алексеев ити этиини олохтоохтор быһааран, эппиэтин улуус дьаһалтатыгар суһаллык биэрэллэригэр сорудахтаата.
Мунньахха ити тыын боппуруостары кэккэ ыһыахтыыр пааркаҕа балаҕан, эдэр исписэлиистэргэ толору хааччыллыылаах уопсай дьиэ, Дьокуускайга Иван Мигалкин аатын уулуссаҕа иҥэрии, кини аатынан бириэмийэни олохтооһун курдук боппуруостар эбии турдулар. Улуус дьаһалтатыттан кэлбит дэлэгээссийэ хас биирдии боппуруоһу үөрэтэн, ханнык хайысханан үбүлээһин барыан сөбүн олус үчүгэйдик быһааран, ырытан биэрдэ.
Холобур, өрүс суола арылынна даҕаны инвестор – Тулунаттан төрүттээх Анатолий Калинов салайааччылаах тутуу тэрилтэтэ эдэр исписэлиистэргэ анаан 4 квартиралаах дьиэни тута кэлэрэ быһаарыллан турар эбит. Бу үтүө дьыала чэрчитинэн ыытыллар тутуу үлэҕэ киирдэр эрэ, үбүн-аһын улуус дьаһалтата көрүөх буолла. Манна улуус баһылыга Тулуна эдэр баһылыга Петр Бурнашеву үлэни сөпкө салайан иһэрин, нэһилиэк сайдарын туһугар үлэтин сыаналыырын бэлиэтээтэ.
Бу мунньахха хас турбут боппуруос барыта суол-суол ырытыллан, сөптөөх түмүккэ кэллэ дии санаатым. Онуоха олохтоохтор өттүлэриттэн элбэх хамсаныы наадата, тустаах тэрилтэлэргэ докумуон үлэтин биир ситимнээхтик ыытары улуус баһылыга Василий Алексеев солбуйааччытын Семен Бурнашеву сорудахтаата. Онон бүгүҥҥү тэриллибит мунньах сыалын ситтэ, түмүккэ, Василий Алексеев: “Улууспут сайдарын туһугар хас биирдиибит эн-мин дэһиспэккэ бииргэ үлэлиэххэ, оччоҕо барытын кыайыахпыт”, – диэтэ.
Наталья Попова
Хаартыскалар: улуус дьаһалтатын пресс-киинэ