Бороҕон нэһилиэгэр улуус тэрилтэлэрин салайааччылара, исписэлиистэрэ нэһилиэк олохтоохторун кытта көрүстүлэр. Ол курдук социальнай көмүскэл управлениетын салайааччыта Елена Кривошапкина, пенсионнай управление исписэлииһэ Сеанна Сивцева, социальнай көмүскэл управлениетын МСП-га кылаабынай исписэлииһэ Ирина Беркина, исписэлиис Анна Бурнашева, “Мин Докумуоннарым” киинтэн Демид Прибылых, дьарыктаах буолуу киинин исписэлииһэ Матрена Ноговицына нэһилиэк олохтоохторун ыйытыыларыгар сөптөөх хоруйдары биэрдилэр. “Саха” НКИХ филиалыттан Владимир Копырин, Петр Аргунов ыалдьыттаатылар.
Бороҕон нэһилиэгин баһылыгын солбуйааччы Марсен Протопопов нэһилиэкпититтэн социальнай хантараакка киирсэн бэйэ дьыалатын тэринэн үлэлиир олохтоохторбутун билиһиннэрдэ. Быйыл кэтэх хаһаайыстыбаларын кэҥэтэн, Вера, Анатолий Габышевтар саҥа улахан хотон туттан киирдилэр. Егор Иванов массыына көлүөһэтин өрөмүөннүүр өҥөнү саҕалаата, Саина, Василий Илларионовтар нэһилиэнньэни ыраас иһэр уунан хааччыйан саҕалаан дьон сэҥээриитин ылаллар.
Бэйэ дьыалатын тэринэн, нэһилиэнньэҕэ олус наадалаах өҥөлөрү оҥорууга ылсыбыт дьиэ кэргэттэри көрсөн, үлэлэрин сиһилии билистилэр, “Саха” НКИХ биэриитигэр уһуллулар. 2021 сыллаахха социальнай хантараагы ылан дьиэлэригэр бэйэ дьыалатын тэриммит эдэр ийэлэргэ Виктория Петроваҕа (кондитерскай), Ирена Стручковаҕа (маникюрнай) социальнай көмүскэл управлениетын салайааччыта Елена Кривошапкина, Ирина Беркина сылдьан үлэлэрин билистилэр.
Маннык көрсүһүүлэр биһиэхэ сылын аайы ыытыллаллар. Баһылыгы солбуйааччы Марсен Протопопов улуус тэрилтэлэрин салайааччыларыгар махтал суруктары туттарда.
Светлана Прудецкая, уопсас. кэрэсп., бибилэтиэкэр