Улуустааҕы социальнай кэлим киин стационарнай отделениетыгар «Кустук» оҕо сайыҥҥы былаһаакката сылын аайы үс сезонунан 30 оҕону хабан үлэлиир. Бастакы сезон бэс ыйын 2 күнүттэн 19 күнүгэр диэри ыытыллыбыта.
Бастакы сезон хайысхатынан оҕо дьоҕурун бары өттүнэн сайыннарыы, үлэ үөрүйэхтэригэр сыһыарыы буолла Иккис сезон от ыйын 6 күнүттэн, саҕаламмыта уонна 23 күнүгэр түмүктэниэҕэ. Сезон эппиэттээх салайааччыта, соц. педагог Майя Ноговицына иилээн-саҕалаан тэрийэн ыыта сылдьар. Былаһаакка хайысхата: оҕо билэр-көрөр дьоҕурун сайыннарыы. Үһүс сезон атырдьах ыйын 3 күнүттэн 20 күнүгэр диэри үлэлиэхтээх. Эппиэттээх салайааччынан социальнай педагог Лиана Иннокентьева үлэлэһиэҕэ. Хайысхата: төрөөбүт тылы – саха тылын сайыннарыы, өрө тутуу, тарҕатыы.
Сезон аайы уоннуу араас саастаах оҕолор, кыргыттар, уолаттар хабыллан, бары өттүнэн сайдалларыгар, билиилэрин-көрүүлэрин кэҥэтэллэригэр биһиги тэрилтэбит уопуттаах специалистарбыт кыһаллаллар, араас хабааннаах, интэриэһинэй дьарыктары, маастар-кылаастары, бырааһынньыктары, тэрээһиннэри ыытабыт. Ону таһынан экскурсияларга сылдьан айылҕалыын алтыһан элбэх саҥаны билэн-көрөн күннэрин биллибэттик, туһалаахтык атааралларын ситиһэбит.
Бу былаһааккаҕа элбэх оҕолоох дьиэ кэргэн, анал байыаннай дьайыы кыттыылаахтарын оҕолоро, олох араас ыарахаттарын көрсөр ыаллар оҕолоро хабыллаллар. Биһиги ыытар араас хабааннаах тэрээһиннэрбитигэр сылын аайы бэйэлэрин баҕа өттүлэринэн үөрэ-көтө кыттар волонтердардаахпыт. Кинилэр биһиэхэ куруук күүс-көмө, өйөбүл буолалларыгар махталбыт муҥура суох. Хас сезон аайы оҕолорбут үөрэ-көтө, астына кэлэллэриттэн үөрэбит, оҕо саас дьоллоох түгэннэрин бэлэхтиибит.
Юлия Бурцева, социальнай педагог