Анал байыаннай дьайыы кыттыылаахтара итиэннэ кинилэр дьиэ кэргэттэрэ олоххо бигэ тирэхтээх, дьарыктаах, дохуоттаах буолалларын туһугар судаарыстыба өттүттэн анал дьаһаллар, миэрэлэр ылыллаллар. Бу туһунан Дьарыктаах буолуу улуустааҕы киинин салайааччыта Юрий СЛЕПЦОВ маннык иһитиннэриилээх:
– Анал байыаннай дьайыы кыттыылаахтара уонна кинилэр дьиэ кэргэттэрэ үлэнэн хааччыллыылаах буолууларыгар болҕомтобутун туһаайан араас өрүттээх үлэни-хамнаһы ыытабыт. Ол курдук, сөптөөх үлэни булалларыгар сүбэлиибит, анал анкетаны сөпкө толороллоругар көмөлөһөбүт. Кинилэр дьиэ кэргэттэрин чилиэннэрэ, ол иһигэр 14-18 саастарыгар диэри оҕолор үөрэхтэриттэн иллэҥ кэмнэригэр үлэлээх буолууларыгар, итиэннэ төлөбүрдээх уопсастыбаннай үлэнэн хааччыллыыларыгар үлэлэһэбит. Үлэтэ суох эбэтэр эбии идэни ылар кэмнэригэр социальнай адаптацияны ааһалларыгар кыһаллабыт. Ханнык сөптөөх идэни талалларыгар тэрээһин үлэни ыытабыт. Анал идэни ылалларыгар, атын да сирдэргэ баран үөрэнэллэригэр усулуобуйа тэриллиитигэр кыттыһабыт. Үлэ булар кэмнэригэр уйулҕа өттүгэр көмөлөһөбүт. Дьарыктаах буолуу киинин иһинэн үлэ көрдөөччүлэргэ, үлэтэ суохтар атын сиргэ үлэ булан көһөллөрүгэр тирэх буолабыт. Предприниматель быһыытынан эбэтэр бааһынай хаһаайыстыбаны тэрийэргэ судаарыстыбаннай регистрацияны аастахтарына, 150 тыһыынчалаах үбүнэн көмөнү оҥоробут. Итиэннэ Анал байыаннай дьайыыттан инбэлиит буолан кэлбиттэргэ эмиэ көмөлөһөбүт.
Саха сиринээҕи «Мой бизнес» ГАТ тэрилтэ нөҥүө Анал байыаннай дьайыы кыттылаахтара уонна кинилэр дьиэ кэргэттэрэ «СВОе дело\14» диэн үөрэтэр бырайыак нөҥүө бизнес тэрийэргэ өйөбүл ылыахтарын сөп.
Светлана Сивцева