Саха Өрөспүүбүлүкэтин Бырабыыталыстыбатын иһинэн ЗАГС управлениета Дьиэ кэргэн, таптал, эрэллээх буолуу күнүгэр анаан кэргэнниилэр хаартыскаларын күрэһин биллэрбитэ. Манна араас улуустан барыта 16 ыал дьон кытынна. Күрэс түмүгүнэн Уус Алдан улууһун олохтоохторо Варвара уонна Иван Тордуяновтар Гран-при үрдүк аатын ыллылар уонна Өлүөнэ очуостарыгар устар романтическай айаҥҥа путевканы бэлэх туттулар.
Тордуяновтар эдэр эрдээҕинээҕи хаартыскаларын, оччолорго кэппит таҥастарын кытта кэтэн сыллары уҥуордаан урукку хаартыскаларын хатыылаан көрдөрбүттэрэ – бу чахчы да кэмҥэ-кэрдиискэ бэриммэт кэргэнниилэр бөҕө сыһыаннарын, бигэ туруктарын туоһулаата.
Улууспут биир киэн туттар дьоһун ыалын аҕата Иван Тордуянов күрэскэ кыттыыларын туһунан маннык кэпсээтэ:
– Маннык куонкурус биллэриллибитин интернет ситимигэр көрөн кыыспыт Туяра булан ыыппыта. Урукку хаартыскаларбытын уонна таҥаспытын кыыспыт кэлэ сылдьан булан, наардаан, биһигини хаартыскаҕа түһэртээн, коллаж оҥорон күрэскэ ыыппыта.
Биһиги ыал төрүкү да урукку малы-салы олох кэрэһитэ оҥостон киччэллээхтик уурар үгэстээхпит. Кэргэмминээн 34-с сылбытын бииргэ, биир санаанан салайтаран, биир ситиминэн олорон кэллибит. Ол да иһин буолуо, наар биир буола сатыыбыт, холобур, саха таҥаһа буоллун, оҕолорбут банкеттара, бэйэбит үбүлүөйдээх күннэрбит барыта пааранан оҥостон таҥна, тэринэ сатыыбыт.
Иккиэн «Умсулҕан» улуустааҕы коллекционердар түмсүүлэрин чилиэнэ буолабыт. Сахабыт төрүт үгэһин тутуһабыт, барытын кэм кэрэһитэ оҥостон мунньабыт киэн тутта кэпсиибит, эбэн-сабан тыыннаан биэрэбит. Өлүөнэ очуостарыгар путевка тутан олус үөрдүбүт, Сахабыт сирин кэрэ-мааны айылҕатын көрөн, сынньанан, күүс-сэниэ ылан кэлиэхпит буоллаҕа.
Мария АРГУНОВА