Бүгүн улууспут орто оскуолаларын кыһыл, үрүҥ көмүс мэтээлинэн бүтэрбит выпускниктары чиэстиир үөрүүлээх тэрээһин буолла. 2023-2024 үөрэх дьылыгар улуус 23 орто оскуолатын 228 үөрэнээччи бүтэрэн бу күннэргэ орто оскуоланы бүтэрбиттэрин туоһулуур аттестаттары илиилэригэр туттулар. Бу оҕолор ортолоругар улуус, республика киэн туттар үөрэнээччилэрэ, араас таһымнаах научнай-практическай конференциялар, ааҕыылар, олимпиадалар кыайыылаахтара, биллэр спортсменнар бааллар.
Быйылгы выпускниктартан кыһыл көмүс мэтээли 9 үөрэнээччи, үрүҥ көмүс мэтээли 11 оҕо ситистилэр. Бүгүн кинилэртэн кыһыл көмүс мэтээли Лөгөйдөөҕү лицей интернат выпускницата, Бүтүн Россиятааҕы научнай-практическай кэмпириэнсийэ кыайыылааҕа уонна призера, саха тылыгар уонна литературатыгар Үөрэнээччилэр Бүтүн Россиятааҕы олимпиадаларын региональнай этабын кыайыылааҕа Айгыына Бурнашева, Лөгөйдөөҕү лицей интернат выпускницата, математикаҕа, черчениеҕа Үөрэнээччилэр Бүтүн Россиятааҕы олимпиадаларын муниципальнай этабын кыайыылааҕа, «Моя профессия IТ» кыайыылааҕа Алеся Лугинова, Лөгөйдөөҕү лицей интернат выпускницата, Бүтүн Россиятааҕы научнай-практическай кэмпириэнсийэ кыайыылааҕа уонна призера, литератураҕа, обществознаниеҕа, саха тылыгар Үөрэнээччилэр Бүтүн Россиятааҕы олимпиадаларын муниципальнай этабын кыайыылааҕын Алина Ноговицына, Мүрүтээҕи уолаттар гимназияларын выпускнига, Үөрэнээччилэр Бүтүн Россиятааҕы олимпиадаларын региональнай түһүмэҕин информатика уонна право предметигэр икки төгүллээх призера, норуоттар икки ардыларынааҕы «Туймаада» олимпиада кыттыылааҕа, Саха сирин бастакы президенэ Михаил Николаев оскуолаларын ситимин олимпиадатыгар информатика предметин кыайыылааҕа Дуолан Гаврильев, Мүрүтээҕи уолаттар гимназияларын выпускнига, Үөрэнээччилэр Бүтүн Россиятааҕы олимпиадаларын региональнай этабын обществознание предметигэр кыттыылааҕа, улууска английскай тыл предметигэр хас да төгүллээх призера, республиканскай “ЯРА” куоҥкурус кыайыылааҕа Сергей Гоголев, Бэйдиҥэ орто оскуолатын выпускницата, Үөрэнээччилэр Бүтүн Россиятааҕы олимпиадаларын физкультураҕа региональнай түһүмэҕин призера, республикатааҕы цифровой искусство аһаҕас турнирын призера, «Smart» омук тылынан ыытыллар өрөспүүбүлүкэтээҕи математика олимпиадатын призера, волейболга Уус Алдан улууһун оҕолорго уонна улахан дьоҥҥо сүүмэрдэммит хамаандатын чилиэнэ Евгения Дегтярева, Найахы орто оскуолатын выпускницата, нуучча тылыгар Үөрэнээччилэр Бүтүн Россиятааҕы олимпиадаларын муниципальнай этабын кыайыылааҕа, «English World» республикатааҕы олимпиадатын кыайыылааҕа, ХИФУ ыытар үөрэнээччилэр олимпиадаларыгар математика уонна информатика предметтэрин үһүс миэстэлээҕэ Алла Арсентьева, Суотту орто оскуолатын выпускницата, үөрэх туҋгуна, улуустааҕы «Интегра» хамаанданан олимпиада призера, «Туос мааска» театральнай коллективтары республикатааҕы көрүү Гран-при хаһаайката, «Уроки истории – в наших сердцах» театральнай туруоруу республикатааҕы маҥнайгы күрэһин кыайыылааҕа Нарияна Заровняева туттулар.
Салгыы үрүҥ көмүс мэтээл хаһаайыттара чиэстэннилэр: Мүрүтээҕи уолаттар гимназияларын выпускнига, Үөрэнээччилэр Бүтүн Россиятааҕы олимпиадаларын муниципальнай этабын нуучча тылын предметин кыайыылааҕа Артем Татаринов, Мүрүтээҕи уолаттар гимназияларын выпускнига, политехническай предметтэргэ Саха сирин үөрэнээччилэрин олимпиадатын супер финалын призера, «Инникигэ хардыы» научнай-практическай кэмпириэнсийэ призера, Казань куоракка ыытыллыбыт Лобачевскай аатынан норуоттар икки ардыларынааҕы конференция призера, СӨ бастакы президенэ Михаил Николаев оскуолаларын ситимин олимпиадатыгар политех, биология предметтэрин кыайыылааҕа Айтал Матвеев, Сыырдаах орто оскуолатын выпускницата, үөрэх туйгуна, экология, биология предметтэрин олимпиадаларын кыайыылааҕа, призера, волейболга, баскетболга, шашкаҕа улуус хас да төгүллээх чемпиона, призера Валерия Бурцева, Сыырдаах орто оскуолатын выпускницата, үөрэх туйгуна, экология предметигэр Үөрэнээччилэр Бүтүн Россиятааҕы олимпиадаларын региональнай этабын кыайыылааҕа, призера, Бүтүн Россиятааҕы научнай-практическай кэмпириэнсийэ дипломана Кристина Ширяева, Бээрийэ орто оскуолатын выпускнига, географияҕа Үөрэнээччилэр Бүтүн Россиятааҕы олимпиадаларын улуустааҕы этабын призера, «Инникигэ хардыы» научнай-практическай кэмпириэнсийэ улуустааҕы этабын кыайыылааҕа, Камчатскай кыраайга ыытыллыбыт Бүтүн Россиятааҕы «Экосистема. Заповедный край» ыччат форумун кыттыылааҕа, «Инновации и развитие-2023» республикатааҕы НПК кыайыылааҕа, республикатааҕы араас айар күрэстэр призердара Иван Васильев, Курбуһах орто оскуолатын выпускнига, үөрэх туйгуна, «Үрүйэчээн» үҥкүү ансаамбылын, «Дьоҕур» уолаттар ааҕыыларын кулуубун, «Сардаҥа» фольклор ансаамбылын иитиллээччитэ, нуучча тылыгар Үөрэнээччилэр Бүтүн Россиятааҕы олимпиадаларын улуустааҕы этабын кыайыылааҕа Айсен Местников, Лөгөйдөөҕү лицей интернат выпускницата, Бүтүн Арассыыйатааҕы научнай-практическай кэпмпириэнсийэ призера, «Кэскил-медиа» корреспондена Ангелина Игнатьева, Мүрү 1 №-дээх орто оскуолатын выпускницата, омук тылыгар Үөрэнээччилэр Бүтүн Россиятааҕы олимпиадаларын муниципальнай этабын кыайыылааҕа, призера, омук тылыгар республикатааҕы IV олимпиада призера, уруһуй күрэстэрин кыттыылааҕа, дипломана Уйгулаана Спиридонова, Мүрү 2 №-дээх орто оскуолатын выпускницата, үөрэх туйгуна, теннискэ оҕолорго Уус Алдан улууһун сүүмэрдэммит хамаандатын чилиэнэ, омук тылыгар, математикаҕа, обществоҕа, ОБЖ-га Үөрэнээччилэр Бүтүн Россиятааҕы олимпиадаларын муниципальнай этабын призера, араас НПК-лар кыайыылаахтара, дипломаннара Дайаана Троева.
Үтүмэн сыранан оскуоланы мэтээлинэн бүтэрэр үрдүк чиэскэ тиксибит оҕолору, учууталлары, төрөппүттэри Уус Алдан улууһун баһылыга Василий Аммосов эҕэрдэлээтэ, дохсун ытыс тыаһын ортотугар мэтээллэри туттарда.
Василий Иванович быйыл Биир кэлим экзамены 90-100 баалга туттарбыт үөрэнээччилэргэ, кинилэри бэлэмнээбит учууталларга харчынан бириэмийэ олохтообута. Онон Биир кэлим экзамеҥҥа литератураҕа 94, саха тылыгар уонна литературатыгар 92 баалы ылбыт Лөгөйдөөҕү лицей интернат выпускницата Айгыына Бурнашеваҕа 50 тыһыынча суумалаах икки сертификатынан наҕараадалаата. Итиэннэ Айгыынаны литератураҕа үөрэппит Лөгөйдөөҕү лицей интернат нуучча тылыгар уонна литературатыгар учуутала Надежда Бурнашеваҕа, саха тылыгар уонна литературатыгар үөрэппит Лөгөйдөөҕү лицей интернат саха тылыгар уонна литературатыгар учуутала Валентина Тищенкоҕа эмиэ 50 тыһыынча суумалаах сертификаты туттарда. Салгыы улуустааҕы үөрэх салалтатын начаалынньыга Степан Литвинцев медалистар төрөппүттэригэр, кылаас салайааччыларыгар махтал суруктары туттарда.
Выпускниктар ааттарыттан харда тылы этэр чиэс Айгыына Бурнашеваҕа бэрилиннэ. Оттон төрөппүттэр ааттарыттан эҕэрдэ тылы Мүрүтээҕи уолаттар гимназияларын төрөппүтэ Аграфена Гаврильева эттэ.
Мария АРГУНОВА