Улуу Кыайыы 80 сылын көрсө бэлэмнэнии үлэ чэрчитинэн бүгүн «Россия ийэлэрэ» уопсастыбаннай хамсааһын Парасковья Борисова салайааччылаах Саха сиринээҕи салаатын 2019 сылга киирбит бырайыагынан «Бессмертный материнский подвиг» көрдүүр-чинчийэр экспедицияны Уус Алдаҥҥа ыытыы былаанын туһунан кэпсэттилэр уонна бырайыак саҕаламмытын биллэрдилэр.
Бырайыак сүрүн сыалынан Аҕа дойду Улуу сэриитигэр уолаттарын сүтэрбит ийэлэри үйэтитии буолар. Улууска эрдэ ыытыллыбыт үлэ түмүгүнэн 11 нэһилиэктэн аҕыс ийэ туһунан бибилэтиэкэ сайтыгар киирбит эбит. Урукку өттүгэр үстүү оҕотун сэриигэ атаарбыт ийэлэр сурукка тиһиллибит эбит буоллахтарына, билигин сэрии толоонугар биир оҕотун сүтэрбит ийэ аата-суола, олоҕо суруллан сурукка киириэҕэ. Манна эппиэттээх хамыыһыйаттан ураты туһааннаах тэрилтэлэр, оскуола оҕолоро үлэлэһэллэрэ этилиннэ. Эһиил ыам ыйын 9 күнүгэр диэри үлэ түмүллэн, анал сайтка киириэхтээх.
Бу бырайыагы улууска салайан ыытар хамыыһыйа тэрилиннэ, онно бэрэссэдээтэлинэн улуус дьаһалтатын баһылыгын социальнай эйгэҕэ солбуйааччы Анатолий Сторожев, бэрэсэдээтэл солбуйаачытынан «Россия ийэлэрэ» уопсастыбаннай хамсааһын улуустааҕы салаатын салайааччыта Сусанна Аммосова итиэннэ үлэлиир хамыыһыйа чилиэннэринэн улуустааҕы кииннэммит бибилэтиэкэ тиһигин дириэктэрин эбээһинэһин толорооччу Иван Копырин, үөрэх салалтатын начаалынньыга Степан Литвинцев, култуура салалтатын начаалынньыга Сергей Нафанаилов, ыччаты уонна дьиэ кэргэни өйүүр социальнай-психологическай киин улуустааҕы салаатын салайааччыта Саргылаана Никитина, кииннэммит бибилэтиэкэ тиһигин дириэктэрэ Варвара Окоемова, Сэһэн Ардьакыап аатынан историяны-кыраайы үөрэтэр мусуой дириэктэрэ Павел Пермяков, бэтэрээннэр улуустааҕы сэбиэттэрин бэрэссэдээтэлэ Олег Федоров, «Россия ийэлэрэ» уопсастыбаннай хамсааһын бырайыагын куратора Марианна Федотова киирдилэр.
Мария Аргунова