Улуус баһылыгын 2023 сыллаах үлэтин отчуота саҕаланна. Бастакынан Курбуһах нэһилиэгэр сырытта.
Үс бөһүөлэгинэн олорор улахан нэһилиэккэ бөһүөлэк аайы кыһалҕа араас. Этэргэ дылы, олох баар – кыһалҕа баар. Ол курдук Окоемовкаҕа ыаллар киинтэн ититиигэ холбонуулара ситэриллиитэ этилиннэ. Ордук сытыы кыһалҕанан медицинскэй үлэһит суоҕа буолар эбит. Анал бырагырааманан манна кэлиэхтээх фельдшер анаммытын үрдүнэн миэстэтигэр ыытыллыбатах.
Нэһилиэк саамай кытыы, Чурапчы улууһун кытары быысаһар Балаҕаннаах бөһүөлэгэ толору ититиигэ холбонон олорор. Манна, бүгүҥҥү туругунан, 49 киһи олоҕу уһансар. Балаҕаннаахтар араас тэрээһиннэргэ түмсэр дьиэ баар буолуутун, үүт туттарыытын сүрүн кыһалҕа быһыытынан аҕыннылар.
Оттон Уус Күөлэ нэһилиэк, олох эргийэр киинин быһыытынан кыһалҕата да элбэх. Сүрүн кэпсэтии нэһилиэк уопсай сайдыытын хабан барда. Суол-иис, киинтэн ититии, тыа хаһаайыстыбатын туһунан кэпсэттилэр. Быйыл кыһын айдааны тардыбыт «Юпитер» хампаанньа манна эмиэ ититиигэ үлэлэһиэх буолан баран уһата-кэҥэтэ иһэрэ ахтылынна.
Курбуһах нэһилиэгэр улуус дьаһалтатын ааспыт сыллааҕы үлэтэ сөптөөҕүнэн сыаналанна.
Афанасий Сектяев