Тойон Мүрүтээҕи В.В. Алексеев аатынан уолаттар гимназияларын делегацията Михаил Ефимович Николаев дойдутугар Хаҥалас улууһун Өктөм сиригэр Николаев Ситимин оскуолаларын кытта тэрээһиҥҥэ кытынна.
Балаҕан ыйын 25-26 күннэригэр «Уолан» гимназия 6 үөрэнээччитэ уонна дириэктэр Федор Татаринов, дириэктэри иитэр үлэҕэ солбуйааччы Уолан Колодезников уонна дириэктэри иитэр үлэҕэ итиэннэ оҕо уопсастыбаннай түмсүүтүгэр сүбэһитэ Айыы Куо Троева «Якутия, вперед!» форсайт-сессияҕа кыттыыны ыллылар.
Бастакы күн А.Г. уонна Н.К. Чирээйэптэр ааттарынан Дьокуускай куорат Саха национальнай гимназиятыгар бастакы Президеммит Михаил Ефимович Николаев бииргэ үлэлээбит, алтыспыт дьоно Евгения Исаевна Михайлова, Александр Николаевич Ким-Кимэн, Александр Андреевич Кугаевскай кыттыылаах көрсүһүүттэн саҕаланна. Салҕыы эдэр ыччат, экономика миниистирдэрин солбуйааччыларын, доруобуйа харыстабылын үлэһиттэрин кытта аһаҕас кэпсэтии буолла. Эбиэт кэннэ хамаандаларынан арахсан, Сахабыт сирин сайдыытын сүрүн хайысхаларынан бырайыактары суруйан көмүскээтилэр.
Иккис күн Хаҥалас улууһун Чапаево сэлиэнньэтигэр бастакы Президеммит Михаил Ефимович Николаев төрөөбүт дойдутугар Ситим оскуолара Ил Дархаммыт Айсен Сергеевич Николаевы кытта көрүстүлэр. Көрсүһүүгэ Михаил Ефимоич Николаев чугас дьоно, доҕотторо, бииргэ алтыспыт үөлээннээхтэрэ, биир идэлээхтэрэ уонна хос сиэнэ Марина Куличкина кыттыыны ыллылар. Бу көрсүһүү түмүгүнэн Михаил Ефимович олорон ааспыт чаҕылхай олоҕун, кини дойдутун туһугар киллэрбит сүдү кылаатын үйэтитэр сыалтан уонна буолаары турар Саха Өрөспүүбүлүкэтин Государственноһын күнүн бэлиэтии сыл ахсын маннык көрсүһүү үтүө үгэс буоларыгар баҕа санааларын эттилэр.
Уоланнар көрсүһүүнү олус сөбүлээтилэр, Михаил Ефимович олоҕун бүтүннүү дойдутун сайдыытыгар анаабытын, кини үтүө холобура ыччаты сырдыкка тардыһарга, дьон туһугар олорорго, үлэлииргэ сирдээбитин көрдүлэр-иһиттилэр. Бу тэрээһинтэн сахабыт норуотун чулуу Киһитэ, Салайааччыта М.Е. Николаев дьоһун олоҕо, киэҥ далааһыннаах үлэтэ кэнчээри ыччакка үтүө холобур буола турарыгар бигэ эрэллээх кэллибит.
Айыы Куо Николаевна Троева, дириэктэри иитэр үлэҕэ итиэннэ оҕо уопсастыбаннай түмсүүтүгэр сүбэһитэ