Бүгүн Дьокуускайга педагогическай үлэ миэстэтин өрөспүүбүлүкэтээҕи дьаарбаҥката буолла. Бу тэрээһин өрөспүүбүлүкэҕэ баар үөрэх тэрилтэлэрэ үлэһиттэринэн хааччыллыыларыгар көмөлөһөр сыаллаах үгэс курдук сыллата ыытыллар.
Манна үлэ көрдүүр дьоҥҥо, педагогтары бэлэмниир үөрэх кыһаларын выпускниктарыгар, бүтэрээри сылдьар устудьуоннарга анаан өрөспүүбүлүкэ үрдүнэн тыһыынчаттан тахса үлэ миэстэ турда. Биһиги улууспутуттан үөрэх салалтатын быраап уонна тэрийэр салаатын начаалынньыга Александра Ушницкая, Мүрү 1-гы №-дээх орто оскуолатын дириэктэрэ Петр Баханов кытыннылар.
Салгыы Александра Ушницкая маннык иһитиннэрдэ:
– Уус Алдан улууһугар үөрэх тэрилтэлэригэр кэлэр үөрэх дьылыгар барыта 47 вакансиялаахпыт. Холобур, улуус оскуолаларыгар аҕыс английскай тыл учуутала, аҕыс нуучча тылын уонна литературатын, сэттэ математика, түөрт география, үс муусука, икки биология, физика, информатика, технология уонна биирдии химия, история учууталларын миэстэлэрэ аһаҕас, ону таһынан биирдии тэрийээччи-педагог, психолог, иитээччи миэстэлэрэ бааллар.
Дуогабар баттаһыы буола илик. Дьаарбаҥкаҕа үлэ көрдөнөр дьон интэриэһиргээтилэр, үлэлиэн баҕалаахтары оскуола дириэктэрдэрин кытта сибээһи олохтоохтубут. ХИФУ омук тылын, нуучча тылын уонна литературатын, математика, история, география учууталын идэтигэр үөрэнэр оҕолор кэлэн элбэҕи ыйыталастылар. Дьокуускайдааҕы уонна Намнааҕы педагогическай колледж устудьуоннара элбэхтэр. Урукку кэмнэргэ тэҥнээтэххэ, бэйэбит улууспутуттан төрүттээхтэр интэриэһиргиир буолбуттарын бэлиэтээтибит.
Мария Аргунова