Улууска куттал суох буолуутун сэрэтэр, хааччыйар сулууспа үлэһиттэрэ бу күннэргэ нэһилиэктэри кэрийэн көрө-истэ, кэпсэтии үлэтин ыыта сылдьаллар.
Бэҕэһээ Түүлээх, Бээрийэ нэһилиэктэригэр улуустааҕы ыксаллаах быһыы-майгы сулууспатын салайааччыта Иван Егоров уонна Биир кэлим дьуһуурунай диспетчер сулууспатын начаалынньыга Михаил Пегов, гражданскай оборонаҕа уонна ЫБМ салайааччыта Василий Борисов, улуус дьаһалтатын административнай хамыыһыйатын эппиэттээх сэкирэтээрэ Алексей Винокуров, капитальнай тутуу салалтатын салайааччыта Эрэл Петров сырыттылар.
Нэһилиэнньэ кыаммат араҥатыгар дьиэлэри кэрийэ сылдьан АДПИ (автономный дымовой пожарный извещатель) туруортаатылар. Ону тэҥэ баһаары утары инструктаж аахтылар. Итиэннэ, халаан тахсар түгэнигэр дьону быстах олордор уонна түһэрэр пууннары бэрэбиэркэлээтилэр. Оттон улуус административнай хамыыһыйата нэһилиэк уопсай территориятын уонна нэһилиэнньэ благоустройство быраабылатын тутуһарын көрдө-иһиттэ.
Бүгүн бу бөлөх Өспөх нэһилиэгэр үлэлиир.
Мария АРГУНОВА