Улуус баһылыга Василий Аммосов, улуус дьаһалтатын тыа хаһаайыстыбатыгар управлениетын начальнига Петр Попов бүгүн Таатта улууһугар сүөһү аһылыгын бэлэмнээһин үлэтин тула Ил Дархан Айсен Николаевы кытта сүбэ мунньахха кыттыыны ыллылар.
Баһылык Василий Аммосов улууска тыа хаһаайыстыбатын билиҥҥи туругун, былаанын туһунан дакылаат оҥордо. Кини нэһилиэктэр баһылыктара, тыа хаһаайыстыбатын специалистара уонна хаһаайыстыбалар салайааччылара ходуһаларын кэрийэн көрөн, от үүнүүтүн, төһө от кэлиэн сөбүн барыллаан көрбүттэрин иһитиннэрдэ. От үлэтин кэмигэр саҕалыыр инниттэн хаһаайыстыбалар уматыгынан хааччыллыбыттарын, техникаларыгар өрөмүөн үлэтэ барбытын эттэ.
Бэлиэтиир буоллахха, быйыл Уус Алдаҥҥа 1501 гектарга кормовой ыһыы (эбиэс, элбэх сыллаах от, суданскай от, подсолнух), 1312 гектарга туораахтаах культура ыһылынна, 45 гектарга аһаҕас халлаан анныгар үүннэриллэр оҕуруот аһа, 217 гектарга хортуоппуй олордулунна. От былаана 30000 тоннаҕа тиэрдилиннэ, ону сэргэ 500 тонна сиилэһи бэлэмниир былаан турар.
Быйыл кураан уонна сөрүүн сайын буолан, от үүнүүтэ орто диэн бэлиэтээтилэр. Ол да буоллар, былааны 85% толорорго сорук турар.
Улуус дьаһалтатын пресс-сулууспатын матырыйаалынан