Дүпсүн орто оскуолатын 1984 сыллаахха үөрэнэн бүтэрбит, авиация уонна космонавтика музейыгар үс сыл экскурсоводтар куруһуоктарыгар дьарыктаммыт, космическай тиэмэҕэ Сойуус таһымыгар тиийэ дакылаат ааҕан биһирэммит, билигин Бороҕон олохтооҕо Анастасия Жиркова оскуоланы бүтэрэллэригэр музей үлэтигэр кыттыспыт, куруһуоктарга сылдьыбыт выпуск 12 оҕотугар анал ааттардаах, оччотооҕу кэмҥэ олус сиэдэрэй оҥоһуулаах мэтээли Иван Данилович оҥорторон, мэтээлин кытыытыгар оҕолор ааттарын бэйэтэ суруйан туттарбытын күн бүгүнүгэр диэри харыстаан уурунан сылдьар.
Анал мэтээлин туһунан маннык кэпсиир:
– Биһиги выпустан 12 оҕо музейга сылдьыбыта, онтон 9 оҕото бары Бүтүн Союзтааҕы конференцияларга, ракетомоделистар күрэхтэригэр ситиҺиилээхтик кыттыбыттара. 40 сыл анараа өттүгэр убаастыыр, ытыктыыр учууталбыт, наставникпыт Иван Данилович Жирков космонавтика музейын выпускниктарыгар памятнай мэтээл бэлэхтээбитэ.
Юрий Гагарин ойуулаах, кытыытынан бэйэтин илиитинэн оҥорбут анал суруктаах: «Насте Стрекаловской с уважением И.Д. Жирков». 12.04.1984 диэн күнэ ыйыллыбыт. Сыл-хонук ааһан истэҕин аайы бу мэтээлбит суолтата улаатар. Дүпсүҥҥэ ыытыллыбыт үбүлүөйдээх ыһыахха музейга дьарыктаммыт оҕолортон 5 буолан сырыттыбыт, учууталбыт туһунан үгүһү ахтан-санаан аастыбыт. Мин ыҺыах күн мэтээлбин киэн тутта иилинэ сырыттым.
Елена Сыроватская, уопсас. кэрэсп.