Д.Д. Оллонов аатынан орто оскуолаҕа Танда үрэх сүнньүн оскуолаларын 3-4 кылаастарын икки ардыларыгар 10-с төгүлүн “ПАТРИОТ” диэн байыаннай-патриотическай оонньуу ыытылынна. Бу күрэх Түүлээх орто оскуолатын алын сүһүөх кылаастарын учуутала Елена Винокурова авторскай бырайыага. Күрэҕи Түүлээх оскуолатыгар өр сылларга ОБЖ учууталынан үлэлээбит Николай Турантаев иилээн-саҕалаан ыытта. Дьүүллүүр сүбэҕэ оскуолалартан ОБЖ уонна физкультура учууталлара үлэлээтилэр.
Күрэх балаһыанньатын быһыытынан хамаанда 7-лии киһиттэн тутулуктаах буолуохтаах.
Бастакы түһүмэх – ”Стройу уонна ырыаны көрүү”, иккис – “Военизированнай эстафета”, үһүс – “Автоматы хомуйуу, ыһыы”, онтон “Ботуруоннары хомуйуу”, “Эмсэҕэлээбиккэ көмө”, “Гранатанан сыалы быраҕыы”, “Пневматиканан ытыы” уонна “Канат тардыһыыта”.
Бу түһүмэхтэр түмүктэринэн IV миэстэни В.Д. Лонгинов аатынан Бээрийэ орто оскуолатын “Соколы России” хамаандата ылла (хамандыыр Васильева Юлиана); III миэстэ – И.С. Колодезников аатынан Тиит Арыы ситэтэ суох орто оскуолатын ”Дьулуур” хамаандата (хамандыыр Аргунова Айсена); II миэстэни М.Н. Готовцев аатынан Танда орто оскуолатын “Орлан” хамаандата (хамандыыр Готовцев Демит) уонна I миэстэ Д.Д. Оллонов аатынан Түүлээх орто оскуолатын “Звезда” хамаандата буолла (хамандыыр Васильев Айдын).
Күрэх түмүгүнэн “Лучший командир” – Васильева Юлиана, “Знаток автомата” – Васильев Айдын, “Лучшая санитарка” – Винокурова Милена (Түүлээх), “Меткий стрелок” – Васильев Айдын, “Лучший бронебойщик” – Киренскай Кирилл (Түүлээх), “Самый ловкий” – Готовцев Демит, “Юный армеец” – Аргунова Айсена анал ааттарга тигистилэр.
Байаҕантай нэһилиэгиттэн төрүттээх Россия, ДНР Геройа Алексей Неустроев “Бэргэн ытааччы” анал аата, педагогическай үлэ ветерана, сэрии сылларыгар Түүлээх оскуолатын военругунан үлэлээбит Николай Ушницкай кыыһа Айталина Винокурова олохтообут анал бирииһэ Айдын Васильевка тигистэ.
Үбүлүөйдээх сылга буклеттары Варвара Петухова таҥан оҥордо. Маны таһынан кыттар школалар администрациялара 3000 солк. кыттыһан РИМ рекламнай компанияҕа кубоктары, статуэткалары, медаллары, юбилейнай значоктары оҥотторбуттар.
Туяра Ушницкая, уопсас. кэрэсп.