Бүгүҥҥүттэн биһиги улууспутугар СӨ Бырабыыталыстыбатын 2024 сыллааҕы үлэтин отчуота саҕаланна. Култуура миниистирэ Афанасий Ноев салайааччылаах бастакы бөлөх мунньаҕы Суотту нэһилиэгиттэн саҕалаата.
Улуус биир улахан нэһилиэгэ сүрүн кыһалҕата киинтэн ититии буолар. Ол туһунан улуус баһылыгын, бырабыыталыстыба отчуоттарыгар эппиттэрэ-тыыммыттара хаһыс сыллара буолла.
«Молодежнай» диэн кыбаартал олохтоохторо бэйэлэрэ хомуйан, барыта 2 мөл. 20 тыһ. солк. турба атыыласпыттара үс сыл буолбут. Бырабыыталыстыба бэрэссэдээтэлин солбуйааччы Дмитрий Садовников кэлэ сылдьан балаһыанньаны билсибит эбит да, билигин да хамсааһын тахса илик. Түөлбэ олохтоохторо туруорсуу сурук биэрбиттэрин, Афанасий Ноев тустаах аадырыһыгар Дмитрий Садовниковка тиэрдиэм диэн эрэннэрдэ.
Оҕуруоттаахха 25 ыал автономнай гаастааһыҥҥа холбонон, быйылгы кыстыгы туораан эрэллэр. Бу инникитин киэҥ кэскиллээҕинэн өрөспүүбүлүкэҕэ тарҕанарыгар баҕаларын эттилэр. Ол эрээри, гаас сыаната үрдээһинин түмүгэр тиэйэн аҕалыы олус ыараан, кыһалҕа буолуох курдук эбит. Билигин гааһы Бүлүү Кыһыл Сыырыттан эрэ аҕалалларынан, ол олус ырааҕынан тиэйиитигэр субсидияны эбэтэр улуус бэйэтэ тиэйэн аҕалар массыыналаах буоларын туруорустулар.
Итини таһынан суоттулар оскуола оҕото аһыырыгар көрүллэр харчы олус кыратын эттилэр. Күҥҥэ 103 солк. эбит. Оттон интэринээккэ олорор оҕоҕо 138 солк. ≪Бу билигин сыана ыарыы турар кэмигэр хайдах да табыллыбат≫, – дииллэр.
Итини тэҥэ суол хаайтарыытыгар кэмигэр ≪Ирбиһинэн≫, катерынан дьону таһааччылар билиэттээх буолалларын туруорустулар.
Афанасий Копырин