Оҕо көмүскэлин күнүн көрсө Офиснай кииҥҥэ оскуола иннинээҕи саастаах оҕолору иитиигэ олоҕун анаабыт СӨ үөрэҕириитин үтүөлээх үлэһитэ, пед. үлэ бэтэрээнэ Елизавета Сивцева «Сэбиэскэй оҕолор – аккырыыккаларга» диэн сэбиэскэй кэмнээҕи худуоһунньуктар оҕолору уруһуйдаабыт хартыыналарынан сүүсчэкэ аккырыыкканы быыстапкаҕа туруорда. А.Ф. Пахомов, Н.Н. Жуков, Ф.П. Решетников, Т.Н. Яблонская, Д.К. Мочальскай, А.А. Пластов, о.д.а. биллиилээх худуоһунньуктар сэбиэскэй кэм 1931-1986 сыллардааҕы үлэлэринэн аккырыыккалар болҕомтону тута тардаллар.
Быыстапка аһыллыытыгар Елизавета Сивцева худуоһунньуктар хартыыналарын туһунан кэпсээнин мустубут дьон сэргии иһиттилэр. Үөрэх управлениетын начаалынньыгын солбуйааччы Иван Никонов, «Умсулҕан» түмсүүттэн биир идэлээҕэ, пед.үлэ бэтэрээнэ Татьяна Алексеева, үөрэх управлениетын инновационнай-методическай отдел начаалынньыга Лена Дьяконова, кылаабынай специалист Ирина Сыроватская оҕо сааһы санатар баай ис хоһоонноох быыстапка турбутун бэлиэтээтилэр.
Елизавета Федоровна филокартиянан утумнаахтык дьарыктанар, элбэх матырыйаалы муспут кэллиэксийэньиэр буолар. Маннык быыстапканан 2021 сыллаахха куоракка Кулаковскай аатынан Норуоттар доҕордоһууларын дьиэтигэр туран биһирэбили ылбыта. «Сэбиэскэй оҕолор – аккырыыккаларга» быыстапка бу күннэргэ Офиснай кииҥҥэ туруоҕа. Бороҕон олохтоохторун, ыалдьыттарын кэлэн көрөргүтүгэр, ааспыт кэм историятыгар, оҕо саас кэрэ эйгэтигэр төннөн ыларгытыгар ыҥырабын.
Елена СЫРОВАТСКАЯ, уопсас. кэрэсп.