Оҕо көмүскэлин күнүн көрсө «Өркөн» оҕону эбии үөрэхтээһин киинин тэрийиитинэн «Сааскы мичээрдэр» диэн бэрт иһирэх аатынан доруобуйаларынан хааччахтаах оҕолорго аналлаах бэстибээл ыытыллыыта үгэскэ кубулуйбута. Бу тэрээһини аан бастаан олоҕун оҕону иитиигэ анаабыт сатабыллаах салайааччы, айымньыллаах учуутал, педагог, СР үөрэҕириитин туйгуна, РФ уопсай үөрэхтээһинин бочуоттаах үлэһитэ Мария Колесова көҕүлээн тэрийбитэ.
Оҕону эбии үөрэхтээһин киинин дириэктэрэ Яков Колодезников «Сааскы мичээрдэр» тэрээһин туһунан бу курдук билиһиннэрдэ:
– Оҕону эбии үөрэхтээһин киинин коллектива доруобуйаларынан хааччахтаах оҕолорго ураты болҕомтобутун уурабыт. Биһиги оҕоҕо анаан ыытар тэрээһиннэрбитигэр улууспут үгүс тэрилтэтэ, үтүө санаалаах дьон кыттыһаллар, өйөбүл буолаллар. Ол курдук, Уус Алдан улууһун социальнай көмүскэлгэ управлениета, «Ымыы» ураты көрүүлээх оҕолор ийэлэрин түмсүүтэ уонна социальнай партнердар бииргэ кыттыһаммыт “Крылья ангела” диэн саҥа дьыллааҕы бэстибээлбит сылын ахсын ыытыллан, үтүө үгэскэ кубулуйбута, элбэх оҕо уонна төрөппүт махталын ылар.
Быйыл оҕону эбии үөрэхтээһин киинэ көҕүлээбит доруобуйаларынан хааччахтаах оҕолорго аналлаах «Сааскы мичээрдэр» бэстибээл 14 -с төгүлүн ыытылынна.
Бэстибээл бастакы сылларга «Дьоҕур аартыга» диэн аатынан Мария Гаврильевна Колесова көҕүлээһининэн ыытыллыбыта. 2005 сылтан “Сааскы мичээрдэр” диэн ааттанан ыытыллар буолбута. Бэстибээл чэрчитинэн 2017 сылтан “Сладкие добрые дела” уонна “С каждого класса — по мягкой игрушке” аһымал акция ыыттыллар. Бэстибээл сыала-соруга: доруобуйаларынан хааччахтаах оҕолор араас өрүттээх талааннарын арыйыы уонна салгыы сайыннарарыы буолар.
Быйылгы акцияҕа кыттыбыт, өйөөбүт оскуолаларбытыгар, уһуйааннарбытыгар биирдиилээн дьоҥҥо махталбытын тириэрдэбит. Барыгытыгар доруобуйаны, улэҕэ үөрэххэ үрдүк ситиһиилэри, дьолу-соргуну баҕарабын!
Быйлгы бэстибээл күрэхтэһиилэрин түмүктэрэ:
- уруһуйга саастарынан арахсан икки бөлөҕүнэн көрүү буолла. Кыраларга 1-кы миэстэ – Мүрү 2-с оскуолатын 4-с кылааһын үөрэнээччитэ Бурнашева Таня, 2-с миэстэ – Мүрү 1-кы оскуолатын 4-с кылааһын үөрэнээччитэ Бурнашев Петя, 3-с миэстэ – Мүрү 2-с оскуолатын 1-кы кылааһын үөрэнээччитэ Бурнашев Тимур. Улахан бөлөххө 1-кы миэстэ – Суотту оскуолатын 8-с кылааһын үөрэнээччитэ Кылаева Ася, 2-с миэстэ – Суотту оскуолатын 7-с кылааһын үөрэнээччитэ Ушницкай Коля, 3-с миэстэ – Мүрү 2-с оскуолатын үөрэнээччитэ Лугинов Саша. Муҥутуур кыайыылааҕынан Кылаева Ася ааттанна.
- литератураҕа 1-кы миэстэ – Мүрү 1-кы оскуолатын 6-с кылааһын үөрэнээччитэ Арсен Осипов, 2-с миэстэ – Лөгөй лицей-интернатын үөрэнээччитэ Сивцев Антон уонна 3-с миэстэ – Дьокуускайтан Готовцева Лена. Кутуков Антон «Бастыҥ научнай үлэ» номинация кыайыылааҕа буолла, муҥутуур кыайыылааҕынан Мүрү 2-с оскуолатын 7-с кылааһын үөрэнээчитэ Макеева Вика буолла.
- илиинэн оҥоһукка 1-кы миэстэ – Суоттуттан Новоприезжая Айыыкуо, 2-с миэстэ – Мүрү 2-с оскуолатын 4-с кылааһын үөрэнээччитэ Бурнашева Таня, 3-с миэстэ – Суотту орто оскуолатын 5-с кылааһын үөрэнээччитэ Портнягина Намыына уонна Суотту орто оскуолатын 2-с кылааһын үөрэнээччитэ Черосов Егор. Муҥутуур кыайыылаах – Кылаева Ася.
- ырыаҕа, хоһооҥҥо 2-с миэстэ – Чараҥ орто оскуолатын 1-кы кылааһын үөрэнээччитэ Егорова Сандаара, Мүрү 1-кы оскуолатын үөрэнээччитэ Мылаханова Анжелина уонна Суотту орто оскуолатын үөрэнээччитэ Портнягина Намыына 3-с миэстэни үллэһиннилэр. Муҥутуур кыайыылааҕынан Арсен Осипов буолан кыайыы үөрүүтүн биллэ.
Бу тэрээһини ыытыыга улууспут үтүө санаалаах дьоно-сэргэтэ олус көхтөөхтүк кытыннылар. Ол курдук «Минньигэс үтүө дьыалалар» диэн акцияҕа барыта уонтан тахса амтаннаах асчыттар, хаһаайкалар кыттыстыһан, Анна Ушницкая, Екатерина Иванова, Любовь Босикова, Саргылана Данилова, Ирина Осипова, Елена Орлова, Октябрина Бурцева уонна Любомира Алексеева оҕолору минньигэс тортарынан күндүлээтилэр.
«Оҕолорго бырааһынньыгы бэлэхтиэх» диэн акцияҕа Мүрү 1, 2 оскуолаларын, уолаттар гимназияларын, Чараҥ, Майаҕас оскуолаларын үөрэнээччилэрэ, «Өркөн» оҕо киинин уонна «Кэскил» уһуйаан иитиллээччилэрэ, үлэһиттэрэ ордук көхтөөхтүк кытыннылар. Бу акция түмүгүнэн барыта 62 сымнаҕас оонньуур хомуллан оҕолорго бэлэх буолла.
Оттон урбаанньыт Василена Сухова оҕо бырааһынньыгын дьэрэкээн кэрэ шариктарынан киэргэттэ. Маны таһынан инбэлииттэр улуустааҕы түмсүүлэрин аатыттан Елизавета Васильева бириистэри олохтоото.
Быйылгы бэстиибээлгэ кэлбит оҕолор төрөппүттэрин кытта үҥкүү-ырыа аргыстаах үөрүүлээх аһыллыыны көрдүлэр. Кинилэри «Энергия» үҥкүү бөлөҕө уонна «Тулуйхан» оҕо эстраднай ырыа студиятын «Өркөн» оҕо киинин иһинэн үлэлиир Уус Алданнааҕы филиалын ырыаһыт оҕолоро эҕэрдэлээтилэр. Салгыы «Жемчужина» ырыа-хоһоон конкурса буолла. Эбии үөрэхтээһин педагогтарын маастар кылаастарыгар сылдьан элбэҕи биллилэр, саҥаҕа үөрэннилэр. «Бастыҥнар хамсааһыннара» оҕо уонна ыччат түмсүүтүн волонтердара сэргэхситэр оонньуулары ыыттылар. Ол кэнниттэн күрэхтэри үөрүүлээх түмүктээһиҥҥэ кыттыбыт оҕолор бары сымнаҕас оонньуур бэлэх тутан үөрүүлэрэ үксээтэ. Бу кэннэ минньигэс тортары астына дуоһуйа сиэтилэр
Бу курдук оҕо көмүскэлин күнүн көрсө 14-с төгүлүн ыытыллыбыт ураты көрүүлээх оҕолор «Сааскы мичээрдэр» диэн бэстибээллэрэ үөрүүлээхтик түмүктэннэ. Оҕолор уонна төрөппүттэр астынан үөрэн дьиэлэригэр элбэх бэлэхтэрдээх, сырдык кэрэ санаалаах, үөрэн-көтөн дьиэлэригэр тарҕастылар.