Улуу Кыайыы 79 сылын көрсө Мүрү 1 нүөмэрдээх орто оскуолатыгар 7, 8 уонна 10 кылаастар үөрэнээччилэригэр «Патриотизм уонна байыаннай дьайыы» кылаас чааһа ыам ыйын 7 күнүгэр ыытылынна.
РФ, СӨ уонна улууспут былаахтарын «Мүрү» БПК чилиэннэрэ күөрэччи көтөҕөн саалаҕа киллэриилэринэн, сомоҕолуур күүстээх өрөгөй ырыаларынан кылаас чааһа саҕаланна. Оскуола дириэктэрин иитэр үлэҕэ солбуйааччы э.т. Анастасия Татаринова кылгас киирии тылын кэннэ үөрэх управлениетын начаалынньыгын солбуйааччы Тимофей Григорьев байыаннай дьайыы кыттыылаахтарыгар Станислав Кирилловка, Михаил Слепцовка, Георгий Прокопьевка махтал суруктары туттарда.
2006 сыллааҕы оскуола выпускнига, «Эр санаа» уордьан кавалера, байыаннай дьайыы кэмигэр хорсуннук охтубут Василий Даниловка аналлаах монтаһы 6 «б» кылаас үөрэнээччилэрэ долгуйа толордулар. Оскуола лиидэрэ, 9 «б» кылаас үөрэнээччитэ Эрсан Готовцев байыаннай дьайыы кыттыылаахтарыгар оҕолор ааттарыттан махтанан туран кинилэр хорсун быһыыларынан киэн тутталларын, кинилэргэ тэҥнэһэргэ дьулуһуу баар буолуохтааҕын тоһоҕолоон эттэ. Ол кэннэ байыаннай дьайыы кыттыылаахтара уолаттары эрэ кытта аһаҕастык кэпсэттилэр. Эр киһи күүстээх санаалаах, хорсун, Аҕа дойдутун көмүскүүргэ бэлэм буолуохтааҕын уолаттар байыаннай дьайыы кыттыылаахтарын С. Кириллов, М. Слепцов, Г. Прокопьев холобурдарыгар иһиттилэр, көрдүлэр.
Елена Сыроватская, уопсас. кэрэсп.