Дойдуга бэлиэтэнэр Россия ИДьМ үлэһиттэрин күнүн көрсө ветераннарбытын, пенсионердарбытын, коллективпын эҕэрдэлиибин. Эһиэхэ чэпчэкитэ суох эппиэтинэстээх үлэҕитигэр эстибэт эрчими, сиэрдээх быһыыны-майгыны, бэриниилээх буолууну, кыһамньылаах үлэни, үрдүк ситиһиилэри, чыпчааллары баҕарабыт.
Уус Алданнааҕы Ис дьыала отделын 2024 сыл 10 ыйын түмүгүнэн, дьуһуурунай чааска 1810 араас хабааннаах иһитиннэрии, биллэрии киирбит. Ол былырыыҥҥы кэмҥэ тэҥнээтэххэ, 19,9 % элбэх. Быйыл буруйу оҥоруу 88-ка тэҥнэстэ, ол эбэтэр 14,3 %-нан былырыыҥҥы кэмтэн үрдүк. Буруйу оҥоруу үрдээһинэ 13 нэһилиэккэ бэлиэтэннэ, буруйу арыйыы 73,3% тэҥнэстэ. Бу буруйдары ырытар буоллахха, ааспыт сылга киһи олоҕор уонна доруобуйатыгар туһуламмыт буруйдар 22-тэн 27-ҕэ диэри улаатта; киһи баайыгар-дуолугар туһуламмыт буруй 22-тэн 31-гэ диэри улаатта, ол иһигэр түөкүннээһин 19 бэлиэтэннэ; сокуоннайа суох наркотическай сириэстибэлэри эргитиигэ, туһаныыга 5 буруй булулунна; суол быраабылатын кэһэн суолга киһи эчэйиилээх саахалы таһаарыы 3-тэн 2-гэ диэри намтаата; суоппар ыытар быраабын быстаран баран, итирдэр утаҕы иһэн хаттаан уруулга олорон 6 суоппар тутуллан холуобунай эппиэтинэскэ тардылынна; сокуоннайа суох сааны-саадаҕы эргитиигэ, илдьэ сылдьыыга 4 буруй булулунна. Уопсастыбаннай миэстэҕэ буруйу оҥоруу 11-тэн 9-ка диэри аччаата. Бэлиэтэммит буруйдарга холуобунай дьыалаҕа буруйданар киһитэ көстөн, 66 холуобунай дьыала быһаарылынна.
«По горячим следам» 6 буруй арылынна, ити көрдөрүү 2023 сылга 10 этэ. Урукку өттүгэр сууттана сылдьыбыт дьонунан 38, арыгы испит туруктаах дьонунан 34, ханна да үлэлээбэт дьонунан 25 буруйдар оноһулуннулар.
Улууска криминальнай быһыы-майгы биһиги өттүбүтүттэн ыытыллар сэрэтии үлэтиттэн тутулуктаах. Ис дьыала отделыгар араас хайысханан сэрэтии учуотугар 142 киһи турар. Полиция сотрудниктарынан дьон олохсуйан олорор дьиэлэринэн бэрэбиэркэлээһин сырыытын түмүгэр уопсайа 11 777 дьиэ көрүлүннэ. Нэһилиэнньэ түөкүннээһиҥҥэ киирэн биэрбэтин туһугар оскуолаларга, тэрилтэлэргэ, биирдиилээн ыаллары кэрийэ сылдьан элбэх лекциялар тиһигин быспакка ыытылыннылар. Уус Алданнааҕы государственнай экологическай надзор үлэһиттэрин кытта 14 сэрэтэр хайысхалаах рейдэ ыытылынна.
Хабаровскайдааҕы юридическай институкка уопсайа биэс оҕо үөрэнэ сылдьар, быйыл үс оҕо туттарсан киирдэ. Оҕолор үөрэхтэрин бүтэрдэхтэринэ биһиги улууспутугар кэлэн үлэлиэхтээхтэр. Улууспутугар үс оскуолаҕа полиция хайысхалаах түөрт кылаас арыллан үлэлии тураллар. Сылын аайы оскуола оҕолорун ортолоругар сэрэтэр хайысхалаах, иитэр-өйдөтөр сыаллаах, буруйу-сэмэни оҥорботторун туһуттан “Юный друг полиции”, “Вордс-Скилл по деятельности полиция” уонна “Безопасное колесо” күрэстэри тэрийэн ыытабыт. Сулууспатын толоро сылдьан өлбүт биир дойдулаахпыт, “За мужество” орден кавалера, полиция капитана В.В. Бурцев сырдык кэриэһигэр сыл аайы салгын саатынан сыал ытыытыгар улуустааҕы күрэһи тэрийэбит.
Түмүкпэр бииргэ үлэлэһэр тэрилтэлэрбит салайааччыларыгар, нэһилиэктэр баһылыктарыгар, киһи олоҕор уонна доруобуйатыгар, бас билэр баайга-дуолга туһуламмыт буруйу утары охсуһууга, уопсастыбаҕа куттала суох буолууну олохтооһуҥҥа бииргэ үлэлээһиҥҥэ сүҥкэн кылааккыт иһин махтал тылларын этэбит.
Дмитрий Скрябин, Россия ИДьМ Уус Алданнааҕы отделын начальнига, полиция подполковнига