Ыам ыйын 8 күнүгэр биллиилээх государственнай уонна общественнай деятель, Саха сиригэр маассабай спорт хамсааһынын төрүттээбит талааннаах тэрийээччи, ССРС физическэй культуратын туйгуна Николай Николаевич Тарскай төрөөбүтэ 100 сылын бэлиэтиибит.
Киэн туттар биир дойдулаахпыт үтүө аатын үйэтитэр сыаллаах Н.Н. Тарскай төрөөбүтэ 100 сылын көрсө Саха сирин Ил Дархана А. С. Николаев 2023 сыл бэс ыйын 13 күнүгэр 838 №дээх анал дьаһалынан Өрөспүүбүлүкэҕэ тэрийэр кэмитиэтин анал бигэргэммит былаанынан үлэлэр саҕаламмыттара.
Ол курдук, төрөөбүт дойдутугар Баатаҕай нэһилиэгэр Н.Н. Тарскай сыла биллэриллэн «Тарскай төрөөбүт күнүгэр диэри 100 хонук хаалла» диэн тэрээһин буолан ааспыта, Чараҥай алааһыгар Н.Н. Тарскайга анаммыт сэргэ сөргүтүллүө, бөһүөлэк, спортивнай былаһаакка тупсарыытыгар үлэлэр ыытыллаллар.
Быйылгы 2024 сыллааҕы спортка анаммыт өрөспүүбүлүкэтээҕи тэрээһиннэр Бороҕоҥҥо ыытыллара былааннаммыта. Ол курдук, сылын аайы ыытыллар Н.Н. Тарскай кэриэһигэр көҥүл тустууга улахан дьоҥҥо уонна уолаттарга биирдиилээн уонна хамаанданан бастыыр иһин өрөспүүбүлүкэ чемпионата, волейболга өрөспүүбүлүкэ чемпионата, «Азия оҕолоро» спортивнай оонньуулар волейболга сүүмэрдиир күрэхтэһиитэ, мини-футболга өрөспүүбүлүкэ чемпионата ыытылыннылар.
Ыам ыйын 8 күнүгэр Бороҕоҥҥо Н.Н. Тарскай пааматынньыга спорт Дыбарыаһын иннигэр туруоруллуоҕа. Бу күн улуус оскуолаларыгар кылаас чаастара, библиотекаларга кинигэ быыстапкалара тэриллэллэр. Улуустааҕы кииннэммит библиотека тиһигин үлэһиттэрэ Н.Н. Тарскайга аналлаах медиапортал бэлэмнээн библиотека саайтыгар https://tarskiy.uacbs.ru тахсыбыта. Бэс ыйын 8 күнүгэр Баатаҕайга уйгулаах ыһыах ыытыллыаҕа.
Киэҥ билиилээх, талааннаах салайааччы, дьоһуннаах тэрийээччи Николай Николаевич Тарскай Саха сирин спордун историятыгар биллэр-көстөр суолу хаалларбыта, кини аатын үйэлэртэн үйэлэргэ кэлэр көлүөнэ киэн тутта ааттыы, сыаналыы туруохтара диэн баҕа санаабын тиэрдэбин.
Василий Аммосов, Уус Алдан улууһун баһылыга