Бэҕэһээ, олунньу 29 күнүгэр, нэһилиэктэр баһылыктарын планерката буолан ааста. Мунньахха улуус баһылыга Василий Аммосов, дьокутааттар Сэбиэттэрин бэрэссэдээтэлэ Иннокентий Аммосов кыттыыны ыллылар.
Манна нэһилиэктэр олохторун тутаах боппуруостара көрүллэн дьүүллэһилиннилэр. Бастакытынан, бэтэрээннэр сэбиэттэрин үлэтин туһунан улуус бэтэрээннэрин Сэбиэтин бэрэссэдээтэлэ Олег Федоров билиһиннэрдэ. Нэһилиэккэ саамай көхтөөх араҥаҕа болҕомто уҕараабатыгар үлэ барыахтааҕын туһунан этиитин кытары баһылыктар бары сөбүлэстилэр уонна саамай улахан көмөлөөччүлэр буолалларын эттилэр. Олег Федорович бу тэтимтэн түспэккэ Кыайыы 80 сылыгар эмиэ биир ситимнээхтик үлэлэһэргэ ыҥырда.
Биир сүрүн боппуруоһунан бөҕү тоҕуу туһунан буолла. Сокуон ирдииринэн бөҕү аналллаах уонна регистрациялаах эрэ сиргэ тоҕуллуохтааҕа этилиннэ. Боппуруоһу туруорбут айылҕа харыстабылын инспекциятын салайааччы Семен Васильев нэһилиэктэргэ уруккуттан хаалбыт көҥүлэ суох элбэх сыбаалканы ыраастыыры прокуратура кытаанахтык хонтуруоллуурун, ыстарааба улаханын этэн туран манна үлэлэһэргэ сүбэлээтэ. Ол эрээри, ону суох оҥоруу олус элбэх үбү эрэйэринэн, маны улуус баайын-дуолун, сирин-уотун сыһыаннаһыыларын кэмитиэтин кытта үлэлэһэргэ этии киирэн, баһылыктар сөбүлэһэллэрин биллэрдилэр. Бөҕү дьаһайыы араас өрүтэ элбэх. Холобур, убаҕас тобоҕу тоҕуу ханна да бэрт сытыы кыһалҕа буолара ахтылынна. Онон бу боппуруос салгыы да быһаарыллара элбэх.
Салгыы соцконтракка, нолуок бэлиитикэтигэр уларыйыылар, буолаары турар быыбарга бэлэмнэнии туһунан боппуруостары көрөн, быһаарсан тарҕастылар.
Афанасий Сектяев