Нэһилиэктэр баһылыктара быйыл бастакы планеркаларыгар мунньахтаатылар

Бүгүн улуус нэһилиэктэрин баһылыктарын уочараттаах планеркалара буолла. Бу быйылгы сылга бастакы мунньахтара. Барыта алта боппуруос көрүлүннэ.

Ол курдук нэһилиэктэр ааспыт сыллааҕы бүддьүөттэрин туолуутун, үөрэхтээһин, тыа хаһаайыстыбатын, ДьУоКХ, тутуулар, Кыайыы 80 сылыгар бэлэмнэнии туһунан дакылааттар истилиннилэр.

Ордук тыа хаһаайыстыбатын саҥа боломуочуйатын ылыныы боппуруоһугар элбэх этии оҥоһулунна. Сүрүннээн үүтү ыаһыҥҥа уонна ынах төбөтүгэр харчы биэрии тула кэпсэттилэр. Манна элбэх араас санаа этилиннэ. Онон нэһилиэктэринэн сылдьан кэпсэтиигэ да бу боппуруос тула сүрүн кэпсэтии тахсыан сөп эбит.

Үөрэхтээһин боппуруоһугар баһылыктар оскуола нэһилиэктэн туспатык үлэлиирин эттилэр. «Инники өттүгэр нэһилиэк дьаһалтатын кытта бииргэ үлэлэһэр буоллар, оскуола үчүгэй каадырынан хааччылларыгар, үөрэх хаачыстыбата тупсарыгар көдьүүстээх буолуо этэ», – диэтилэр.

Оттон Кыайыы 80 сылынан Кыайыы күнүн бүттүүн улууһунан Бороҕоҥҥо түмсэн ылыахха диэн этиигэ нэһилиэктэр баһылыктара сөбүлэспэттэрин биллэрдилэр. Өрөгөйдөөх үбүлүөйү бэйэлэрин нэһилиэктэригэр бэлиэтиир улахан суолталааҕын эттилэр.

Афанасий Сектяев