Найахы нэһилиэгэр улуус дьаһалтатын отчуотун истибит 58 киһи «үчүгэйинэн» сыаналаата.
Ыйытыылар:
- СВО кыттыылаахтарыгар гуманитарнай көмө;
- тыа хаһаайыстыбатын министиэристибэтэ улуус көрүүтүгэр биэрбит боломуочуйалара;
- суһал көмө массыынаны анатыы — босхо эминэн хааччыллыы;
- уот ситимин, тирэхтэрин саҥардыы;
- суолу грейдердээһин;
- балыыһа тутуута, о.д.а.
Этиилэр сүрүннээн тыа хаһаайыстыбатын сайдыытыгар туһуланнылар. Племхаһаайыстыбалары тэрийэргэ үлэ барара буоллар, «Дьулурҕан» ТХПК ылсан үлэлиэн баҕалаах эбит. Сылгы хаһаайыстыбата эмиэ племенной хаһаайыстыба тэриниэхтэрин баҕараллар. Ынах төбөтүгэр бэриллэр субсидияны туһаныыны уруккунан хаалларар наадалааҕын этэллэр. Бэтэринээрдэргэ үлэлиир усулуобуйаны тэрийэн, дьоҕус дьиэ тутулларыгар этиилээхтэр. Сүөһү хаанын уруурҕаһыыта үксээбитинэн, боруода оҕус ылыллара кэм ирдэбилэ буолбут.
Маны сэргэ тыын кыһалҕаларынан буолар уот ситимин уларытыыга улуус дьаһалтата көмөлөһөрүгэр көрдөстүлэр. Итиэннэ сирин-уотун докумуона оҥоһуллан бэлэм турар балыыһа дьиэтин тутарга өссө да туруорсабыт диэн санааларын эттилэр.
Ольга Шепелева