Татарстан республикатын Казань куоратыгар дроннары көтүтүтүүгэ Бүтүн Россиятааҕы «Пилоты будущего» чемпионат түмүктүүр финала буолан ааста. Күрэһи Россиятааҕы «Бастыҥнар хамсааһыннара» оҕо, ыччат хамсааһына көҕүлээн ыытта.
Бу хамаанданан күрэскэ хамаандаҕа 2 пилот, 1 инженер-техник уонна биир наставник ирдэнэр. Кыттааччылар, холобур, дрон көмөтүнэн таһаҕаһы тиэрдии, дронунан дартс оонньуу курдук түһүмэхтэргэ билиилэрин, сатабылларын көрдөрдүлэр.
Финалга 59 регионтан бастыҥнар талыллан кииристилэр. Кинилэр истэригэр республикабытыттан икки хамаанда кытынна. Онтон биирэ – Уус Алдан улууһуттан Руслан Иванович Жирков салайааччылаах Мүрүтээҕи уолаттар гимназияларын үөрэнээччилэрэ Мичил Николаев (1-кы пилот), Айаан Копырин (2-с пилот), Тимур Федоров (инженер) састааптаах хамаанда.
Күрэс түмүгүнэн икки хамаанда иккиэн 59 регионтан тиийбит 119 хамаандаттан 16 бастыҥ хамаанда иһигэр киирдилэр.
Мария Аргунова