Улуус дьаһалтатын сыллааҕы үлэтин отчуоттуур мунньаҕа түмүктүүр түһүмэҕэ буоларын курдук Мүрү нэһилиэгэр буолла. Атын нэһилиэктэргэ курдук бүгүн улуус киинин олохтоохторо эмиэ отчуоту истэ, санааларын этэ хото кэллилэр.
Соһуйуом иһин, отчуот кэнниттэн бэрт аҕыйах ыйытыы бэрилиннэ. Ити кыайтарбата, бу ситэриллибэтэх диэн хабааннаах ыйытыы суоҕун кэриэтэ. Бары хайысхаҕа, толору да буолбатар, киһи хараҕар быраҕыллар үлэлэр барбыттара ыйытыы аҕыйаҕын кэрэһилээтэҕэ.
Кэпсэтиигэ кыттыбыттар эмиэ ким даҕаны итэҕэс-быһаҕас баар диэн эппэтэ. Улуус киинигэр, кырдьык, дьон олоҕо-дьаһаҕа тупсарын туһугар үлэ күүскэ барар. Сыллата этиллибит киинтэн ититиигэ холбонуу сыыйа быһаарыллан, билигин Мындааба ыаллара толору, Бороҕоҥҥо 90% холбонон олороллоро, саҥа хочуолунайдар тутуллаллара балаһыанньаттан тахсар кыах баарын көрдөрөн эрдэхтэрэ.
Быһата, мунньах бэрт кудуххайдык, биир тыынынан барда. Син элбэх отчуокка сырыттым да, маннык биир тэҥник, ньымсатык барбытын өйдөөбөппүн. Киһини толкуйдатар, оннук ээ диир этиилэр баалларын сиһилии хаһыакка суруйуом.
Афанасий Сектяев