Саха сиригэр пионерскай хамсааһын тэриллибитэ 100 сылын туолуутугар аналлаах тэрээһиҥҥэ Лөгөй лицей-интернатын 6-с кылааһын үөрэнээччилэрэ, кылаастарын салайааччыта Анастасия Стрекаловская ыҥырыыларынан Уһун Күөл орто оскуолатын 6-с кылааһын коллектива баран ыалдьыттаан кэллибит.
Аан айаҕыттан үөрэ-көтө, сылаас чаайынан күндүлээн көрүстүлэр. Үөрүүлээх түгэни саҕалыыр линейкаҕа урукку пионердар, билигин номнуо аҕамсыйбыт дьон, оҕо саастарын эргитэн стройдаан киирэн речевка этэн, пионер саастарын эргиттилэр. Ытыс көхтөөх тыаһынан лицей-интернат директора Михаил Пухов уоттаах-төлөннөөх эҕэрдэтин бары мустубут дьон көрүстүлэр.
Линейка кэнниттэн тимуровскай хамсааһыны салҕаан оҕолор ытык саастаах кырдьаҕастарга тиийэн көмө оҥордулар. Бу күн умнуллубат 10-с кылаастар бэрт тэрээһиннээх, өрө күүрүүлээх кэнсиэрдэринэн түмүктэннэ. Кэнсиэргэ төрөппүттэр кыттыыларын, нарын-намчы үҥкүүлэрин, ырыаларын-тойуктарын кэрэхсии көрдүбүт.
Сарсыҥҥы күнүгэр Остуолбалаах алааска тиийэн “Салют, пионерия!” бырааһынньык саамай көхтөөх чааһа, араас оонньуулар, күрэхтэһиилэр бары мустубут дьону тохтоло суох түмэ тартылар. Бырааһынньык чаҕылхай салютунан түмүктэннэ.
Маннык оҕо саас дьоллоох, умнуллубат түгэнигэр биһигини кытыарбыт лицей-интернат коллективыгар улахан махталбытын тиэрдэбит.
Анна Лыткина, 6-с кылаас салайааччыта Уһун Күөл орто оскуолата