Кыайыы 80 сылын көрсө айаннаабыт «Кыайыы Знамятын» эстафетатын биһиги улууспутугар Нерюнгри оройуонун баһылыгын солбуйааччы Ньургун Владимиров уонна «Юнармия» оҕо байыаннай-патриотическай общественнай хамсааһынын юнармеецтара Николай Карелин, Данил Бусыгин аҕаллылар. Знамяны Ньургун Владимиров Уус Алдан улууһун баһылыгын солбуйааччытыгар Анатолий Сторожевка долгутуулаах быһыыга-майгыга туттарда.

Салгыы «Кыайыы Знамята» эстафетаны СВО кыттыылаахтарыгар, байыаннай дьайыы бэтэрээннэригэр Н.Н. Окоемов аатынан Курбуһах орто оскуолатын учууталыгар, гвардия рядовойа Иван Петровка, «Хорсунун иһин» мэтээл хаһаайына, старшай сержант Роман Ноговицыҥҥа, «Эр санааланыы (хара кириэс)» уордьан хаһаайына, «Бахмут куораты ылыы иһин» мэтээллээх Станислав Кирилиҥҥэ туттардылар.

Кыайыы Знамята 80 сыллаах Кыайыы биһиэхэ чэпчэкитик кэлбэтэҕин, эйэлээх халлаан, кэлэр кэскиллээх дьоллоох олох туһугар олохторун да толук ууран, доруобуйаларын кэрэйбэккэ тыылга турууласпыт дьоммутугар ытык иэстээхпитин, тугунан да кэмнэммэт махталлаахпытын туоһулаан, история хаһан да сүппэт кэрэһитэ буолан үйэлэргэ күөх халлааҥҥа тэлимнии туруоҕа.

Ольга Шепелева