Уус Алданнааҕы социальнай кэлим киин көлүөнэлэри алтыһыннарыыга анаан «Серебряная синергия» бырайыагынан үлэлиир.
Бу бырайыак чэрчитинэн оҕолор аҕа саастаах көлүөнэни кытары көрсүһүүлэрэ тэриллэр, холбоһуктаах тэрээһиннэрэ ыытыллар. Алтыһыы түмүгүнэн аҕа саастаах киһи оҕону көрдөҕүнэ да кынаттанар, оттон оҕо барахсан кырдьаҕас алгыһын ылынар. Онон бу көрсүһүүлэр көмүс түгэҥҥэ тэҥнэнэллэр.
Бу күннэргэ тэрилтэ оҕолорго аналлаах стационарнай отделениетын иитээччилэрэ оҕолорго Курбуһахтааҕы кырдьаҕастар уонна инбэлииттэр дьиэлэрин олохтоохторугар анаан уратылаах оҥоһуктары оҥоттордулар. Иитиллээччилэр кырдьаҕастарга бэлэхтэрин наһаа кыһаллан-мүһэллэн оҥордулар. Ол курдук кинилэр имигэс тарбахтарынан оҕуруонан уонна гиипсэнэн кэрэчээн оҥоһуктары оҥорон таһаарбыттарыттан бэйэлэрэ астыннылар.
Иитиллээччилэр бэлэхтэрин сырдык санаалаах бары үчүгэйи кытары Курбуһахха ыыттылар. Кинилэр санааларыгар бу бэлэхтэри туттахтарына кырдьаҕастар уонна инбэлииттэр олус үөрүөхтэрэ, ыарыыларын да умнан ылыахтара, олоххо тардыһыылара күүһүрүөҕэ. Оҕолор баҕа санаалара туолуохтун!
Светлана Бурцева, уопсас. кэрэсп.