Кэптэни бөһүөлэгэр отчуоттуур мунньахха 84 олохтоох кытынна, ыйытыы даҕаны этии даҕаны үгүстүк киирдэ.
Бастакынан, Лөгөй лицей-интернат наставник педагога, тьютора Марианна Попова ситиһиилээхтик үлэлии-хамсыы олорор, ол эрээри биир да тиэхиньикэтэ суох лицей-интернакка транспорт көрдөстө. Онуоха Василий Аммосов: «Бастакы уочаракка тураҕыт, харгыс көстүбэтэҕинэ, быйыл биэриэхпит», – диэн эрэннэрдэ. Итиэннэ эмиэ биир айымньылаах үлэлээх сынньалаҥ киинигэр өрөмүөҥҥэ үп-харчы көрүллэригэр көрдөстүлэр. Маныаха улуус баһылыга үп кырыымчыгынан сөбүлэспэтэ эрээри, былаанын оҥотторон хардыы оҥорорго сүбэлээтэ.
Нэһилиэгин иннигэр долгуйар Михаил Колодезников туруорсуута үгүс, ол курдук арыы сыаҕа сөргүтүллүөҕүн, Хомустаах – Баатаҕай хайысхалаах Кэптэни иһинэн киирэн ааһар суол уулуссата сырдатыллыан наадатын эттэ, скважина тэстибитин оҥорууга көмөнү, балыыһа ис өттүгэр өрөмүөнү көрдөстө итиэннэ байыаннай дьайыы кыттыылаахтарын, элбэх инбэлиит киһи олорор Никифоров аатынан уулуссаҕа ититии киирэригэр суругунан сайабылыанньаны туттарда. Ону таһынан сайыҥҥы уу ситимин таттараары «Олохтоох көҕүлээһини өйүүр» бырагыраамаҕа кыттан эмиэ мэлийбиттэрин, ол хомолтотун биллэрдэ. Кэлиҥҥи үс сылга үргүлдьү хапсыбатыбыт диэн сонньуйда.
Анатолий Бурнашев эргэ амбулатория, мусуой дьиэлэрин өрөмүөннээн исписэлиистэргэ олорор дьиэ оҥоруохха диэн этии киллэрдэ.
Нэһилиэнньэ улуус дьаһалтата ааспыт сыллааҕы үлэтин үчүгэйинэн сыаналаата.
Мария Аргунова