Алтынньы 18 күнэ – Саха сирин Ийэлэрин күнэ. Өссө бу күн Россияҕа Аҕа күнэ бэлиэтэнэр. Бу күҥҥэ сөп түбэһиннэрэн улууспут биир дьоһун-мааны ыала Омукчановтар дьиэ кэргэннэрин туһунан суруйуум.
Төрүт Мүрү нэһилиэгин олохтоохторо Ульяна, Владимир Омукчановтар оскуола саҕаттан билсэн, оскуоланы бүтэрээт ыал буолан олохторун холбообуттара. Владимир үрдүк үөрэхтээх физкультура учуутала идэлээх, билигин ДьУоКХ тэрилтэтигэр электригинэн үлэлиир. Ульяна Дьокуускайдааҕы педагогическай институтка иитээччи идэтигэр үөрэммитэ. Ону таһынан логопед идэтигэр эбии үөрэнэн билигин «Мүрүчээнэ» оҕо саадыгар логопедынан үлэлиир. Биир уол, икки кыыс оҕолоохтор.
Уоллара Ян финансовай идэлээх, улуустааҕы нэһилиэнньэ социальнай көмүскэлин биир кэлим киинин кылаабынай исписэлииһэ. Улахан кыыс Виолетта Хабаровскайга медучилищеҕа стоматология салаатыгар иккис кууруска үөрэнэр. Кыра кыыс Арина – Мүрү 1-гы №-дээх орто оскуолатын 7-с кылааһын үөрэнээччитэ.
Ити курдук, Омукчановтар дьиэ кэргэн үлэни өрө тутан, дьиэ кэргэн сылаас эйгэтин тэрийэн улууспут биир бигэ туруктаах ыала буолаллар. Дьиэ кэргэҥҥэ ийэ-аҕа оруолун туһунан уонна бэйэтин ийэтин туһунан Ульяна Васильевна бу курдук кэпсиир:
– Оҕону иитиигэ ийэ-аҕа эбээһинэһэ диэн араарбаппыт, биир санаанан салайтаран баран иһэбит. Ийэ быһыытынан кыһамньылаахпын дии сананабын, ол эрээри оҕо иннигэр-кэннигэр умса түспэппин. Болҕомтобун ордук истиҥ сыһыанҥа, аһаҕас кэпсэтиилэргэ уурабын уонна дьарыктаах буолалларын ситиһэ сатыыбын. Аҕалара олус холку майгылаах, араас түгэҥҥэ куруук көмө-тирэх буолар.
Ийэм Варвара Афанасьевна Заболоцкая дьоллоох оҕо сааһы бэлэхтээбитэ. Кини кыра эрдэхпиттэн араас кэрэ таҥастары тигэн маанытык таҥыннарара, куруук ураты, сонун көстүүлээх буоларбар кыһаллара. Аны араас оҥорор маллара эмиэ ураты этилэр, бэл диэтэр, термос иһинээҕи фольганы ылан сиэдэрэй көстүүлээх бантиктары, заколкалары оҥороро. Элбэх тэтэрээттэн тиһиллибит тас өттүгэр барби куукула уруһуйдаах дневнигэ эмиэ туспа, ураты буолара. Ийэм кыра эрдэхпиттэн көрдөрбүт, иҥэрбит сатабыллара билиҥҥи олоҕум сүрүн тутула буолар».
Ити курдук туох барыта ийэ үтүө холобуруттан бэриллэн утум салҕанан, олох киэркэйэн эрдэҕэ. Кэрэни таптыыр киһи тула кэрэни-сырдыгы эрэ саҕар буоллаҕа. Ульяна Васильевна кэрэҕэ тапталынан, туланы тупсарар дьоҕурунан алаһа дьиэ сатабыллаах хаһаайката буолар. Дьиэтин ис-тас бараанын тупсаран, киэргэтэн оҥорорун сөбүлүүр.
Ордук урукку кэм малын саҥардан, сөргүтэн саҥалыы тыынныырынан кэрэхсэтэр. Оҕуруот аһын, сибэкки арааһын олордон бүөбэйдэһэр. Аныгы ийэ сиэринэн спордунан дьарыктанар, СӨ «Факел Победы» уопсастыбаннай спортивнай-патриотическай тэриллии чилиэнэ буолар. Нэдиэлэҕэ үстэ саалаҕа сылдьан эрчиллэр, онтон билигин латино, бачата үҥкүүгэ дьарыктанан эрэр. Хайдах бириэмэ булан барытын ситиһэҕин диэн ыйытыыбар: «Барыта дисциплина буолар. Биир бириэмэҕэ турабын-утуйабын, кэлэр күммүн чааһыгар тиийэ былаанныыбын», – диэн этэр.
Аныгы балысхан тэтимнээх олохпутугар дьиэ кэргэн сыаннаһа өссө үрдүктүк сыаналанара саарбаҕа суох. Биһиги ортобутугар кэлэр кэнчээри ыччакка ийэ-аҕа үтүө холобурун көрдөрөр ыал санааны сырдатар, сүрэҕи үөрдэр.
Мария Аргунова