Хомустаах бөһүөлэгэр быйыл интернет ситимэ киирэн, уот линията сип кабельга уларыйан уонна оскуола киин ититиигэ холбонон сэргэхсийэн олороллор. Ититии киирэригэр хамсааһын тахсан, аны ыаллар дьиэлэригэр киирэрин күүтэллэр.
Итиэннэ оскуолаҕа ирдэбил кытаатан иһэринэн, саҥа оскуола тутуутун былааҥҥа киллэрэри көрдөһөллөр. Билигин оскуола 30 үөрэнээччилээх уонна, ааҕан көрбүттэринэн, биир оччо оҕо атын сиргэ үөрэнэр эбит. Онон саҥа оскуола тутулуннар, оҕо ахсаана элбииригэр эрэллээхтэр.
Итини таһынан 1958 сыллаахха тутуллубут сынньалаҥ киинин дьиэтэ олус эргэрбитинэн, кулуупка эмиэ саҥа дьиэни тутарга уолдьаспытын эттилэр. Оттон оҕо саадын дьиэтигэр уот ситимин уларытары, толору хааччыллыы киирэрин баҕараллар.
Иван Бурнашев сайылыгар уот ситимин киллэттэрээри ыйыппытын, Василий Иванович сайылыктары өйүүр наадатын этэн туран, кыттыһан киллэрэргэ тыл көтөхтө. Онон Уйбаан остуолбаларын бэлэмнээтэҕинэ, дьаһалта өттүттэн атынын быһаарыах буоллулар.
Мария Аргунова