«Саха волонтердар» уопсастыбаннай үтүө санаа холбоһугун биир дойулаахпыт, «Саха» Национальнай көрдөрөр-иһитиннэрэр хампаанньа Москубатааҕы салаатын салаайааччыта Туяра Константинова төрүттээн, бүтүн Россияҕа холобур буолар махталлаах үлэни сүрүннүүр хамсааһыҥҥа кубулуйан, үгүс регион бар дьонун түмтэ. Туяра Николаевна дойдубут тэбэр сүрэҕин эҥэрдээҕи эрэ госпиталларга, балыыһаларга көмөлөспөккө, ханна саха уолаттара эмтэнэ тиийбиттэринэн түбүгүн-садьыгын ыыра ыраатан иһэрэ үөрдэр. Президеммит Владимир Путин: «Калининград – киэҥ-нэлэмэн державабыт саамай арҕааҥҥы форпоһа, биир бэлиэ сорҕото», — диэн бэлиэтээбит Калининградскай уобалаһыгар Туяра Константинова быһаччы дьайыытынан тэнийбит «саха волонтердар» кэккэлэрэ мэлдьи көхтөөх уонна өрүү эрэллээх.
Уус алданнар эмиэ биир дойдулаахтарбыт – ити ураты суоллаах-иистээх региоҥҥа олохсуйбут Саха сирин дьонун-сэргэтин «Земляки Саха» уопсастыбаннай түмсүүтүн тэрийээччитэ, бэрэссэдээтэлэ Туйаара Иванова, «ҮЙЭ» республикатааҕы сурунаал төрүттээччитэ, сүрүн редактора Николай Кривошапкин бу күннэргэ госпиталларынан, балыыһаларынан сылдьан, анал байыаннай эппэрээссийэттэн эмсэҕэлээн кэлэн, эмтэнэ-томтоно сытар уолаттарбытыгар Саҥа дьыл тыынын бэлэхтии айанныыллара киһини үөрдэр.
Туйаара Егоровналаах Николай Николаевичтан сураһан билбиппит, уобалас Гвардейск куоратыгар баар кииннэммит оройуоннааҕы балыыһаҕа Уус Алдан Лөгөй нэһилиэгиттэн төрүттээх Анатолий Аммосов атаҕар иккис
төгүлүн эчэйии ылан, чөлүгэр түһэ сытар эбит. Анатолий аҕата Үөһээ Дьааҥыттан утумнаах буолан, кыргыһыы хонуутугар Верхоян диэн ыҥырыллар ааты ылыммыт.
«Күн-күбэй ийэм Александра Алексеева Кэптэниттэн силис-мутук тардар. Олоххо көхтөөх сыһыаннаах үтүөкэн дьон Анна Павлова, Григорий Дьячковскай, о.д.а. аймахтарым буолаллар. 2023 сыл балаҕан ыйыттан контрагынан сулууспалааччы быһыытынан анал байыаннай эппэрээссийэҕэ кыттыыны ыла барбытым», — диэн Анатолий кэпсиир.
Маҥнай утаа Запорожскай уобаласка уустук уонна тыҥааһыннаах учаастактарга сылдьар штурмовой этэрээккэ Аҕа дойду көмүскэлигэр туруммут. Иккис сылын күһүнүттэн анаммыт Курскай уобалаһыгар 810 №-дээх муора пихотатыгар дьалхааннаах сорудах кэмигэр сибээһэ суох буолан, 1,5 кэриҥэ ый устата сураҕа суох сүппүт киһи курдук ааҕыллыбыт күннэрэ эмиэ күндээрбиттэрин бэлиэтиир.
«Бүгүн букатын да бэйэм биир дойдулаахтарым – Уус Алдантан сыдьааннаах дьон ыалдыттаан сүргэбин көтөхтө. Николай палаатабытыгар киирэн кэлбитигэр тута ханна эрэ көрбүт уолум дии санаатым. Бэйэм филолог идэлээхпин. Туйааралаах Николай төрөөбүт дойдум сонунун үллэстибиттэригэр, Саҥа дьыл чугаһаабыт үөрүүтүн аҕалбыттарыгар, ахсынньы 31 күнүн дэлэй-холой астаах-үөстээх көрсөрбүн хааччыйбыттарыгар махтанабын», — диэн Анатолий үөрэн сэгэлдьийэр.
«Саха волонтердар» хамсааһыны Калининградскай уобаласка иилиир-саҕалыыр Туйаара Иванова уонна анал байыаннай эппэрээссийэ саҕаланыаҕыттан суруналыыс быһыытынан киэҥ ис хоһоонноох үлэни сүрүннүүр, ол иһигэр волонтердар холбоһуктарын утумнаахтык сырдатыыны тэрийэр, биир идэлээхпит Николай Кривошапкин уолаттары үүнээри турар Саҥа дьылынан иҥэмтиэлээх, сибиэһэй аһынан-үөлүнэн күндүлүүргэ санаа сахпыт Туйаара Константинова этиитин тута өйүүргэ быһаарыммыттар. Саха Республикатын Ил Дархана Айсен Николаев бэлэҕэ Россияттан ойдомнук сытар региоҥҥа тиийэрэ уустуктардааҕынан, маннык сатабыллаахтык уонна далааһыннаахтык дьаһаммыттара хайҕаллаах.
Аҕа дойдубут сырдык кэскилин туһугар туруулаһа сылдьар, киэн туттар уолбут Анатолий Аммосов Ньурба Хатыытыгар кинини күннэтэ долгуйа күүтэр, олус ахтар тапталлаах кэргэнигэр, үс оҕотугар, Уус Алдан Кэптэнитигэр олорор аймахтарыгар, доҕотторугар, чуолаан оҕо сааһын аллар атаһа — Геннадий Охлопковка, салаллан эрэр Саҥа дьылынан эҕэрдэтин тиэрдэр. «Махтал истиҥ тылларын Калининградскай уобаласка «Земляки Саха» хамсааһыҥҥа тиэрдиэхпин баҕарабын. Манна биир дойдулаахтарбыт наһаа түмсүүлээхтэрин бэлиэтиир наада. Саҥа сылы көрсөр дьоро киэһэлэригэр биһигини, байыастары, госпиталларбытыттан, балыыһаларбытыттан анаан-минээн көҥүллэтэн, илдьэн-аҕалан, арыаллаан, сахалыы аһынан-үөлүнэн маанылаан сынньаппыттара сэргэхситтэ аҕай. Эйэлээх сарсыҥҥыбыт туһугар маннык бүттүүн сомоҕолоох буола туруох», — диэн кэпсэтиибитин түмүктээтэ.
Наталья ПОПОВА.