Бэҕэһээ, алтынньы 15 күнүгэр, Чараҥ бөһүөлэгэр В. А. Протодьяконов-Кулантай аатынан түмэлгэ “Үһүс саас оскуолатын” волонтер-педагога, Уус Алдан улууһун норуотун маастара, Мүрү нэһилиэгин бочуоттаах олохтооҕо Галина Охлопкова «Оһуор, ойуу кыбытан» диэн быыстапката буолла.
Быыстапканы түмэл сэбиэдиссэйин солбуйааччыта Дина Бурцева иилэн-саҕалаан. Ол кэнниттэн Галина Семеновна иистэрин көрдөрө-көрдөрө кэпсээтэ. Биһиги “Үһүс саас оскуолатын” «Айар иис» куруһуога Галина Семеновна ыйыытынан тикпит сэлиэччикпитин, берет, сэлээппэ, тюбетейка, рюкзакпытын кэтэн көрдөрдүбүт. «Айар иис» куруһуок аатыттан Анастасия Копыриналыын эҕэрдэлээн туран, учууталбытыгар сэмэй бэлэхпитин, “Үһүс саас оскуолатын” координационнай сэбиэтин махтал суругун, сэмэй бэлэҕин туттардыбыт.
Кэлбит ыалдьыттар Галина Семеновна үлэтин наһаа астына көрдүлэр, үгүһү интэриэһиргээн ыйыттылар. Ону кытта биһиги үлэлэрбитин эмиэ сэргээтилэр. В. А. Протодьяконов-Кулантай аатынан түмэл коллективыгар Галина Семеновна быыстапкатын туруорбуккутугар махтанабытын тиэрдэбит.
Галина Мырсанова, Уус Алдан улууһун маастара, Үһүс саас оскуолатын «Айар иис» куруһуогун чилиэнэ