Улуустааҕы социальнай кэлим киин стационарнай отделениетын базатыгар сыллата үлэлиир «Кустук» оҕо сайыҥҥы былаһааккатын иитиллээччилэригэр аптаах түгэни бэлэхтиир фокусник уол – Мүрүтээҕи уолаттар гимназияларын 11-с кылааһын үөрэнээччитэ Сайаан Бурнашев-SAYMAG ыалдьыттаата.
Сырдык мичээрдээх ини-бии уолаттар саалаҕа киирэн кэлбиттэрин оҕолор ытыстарын таһынан көрүстүлэр. Сайаан быраата Айаал убайын сүрүн көмөлөһөөччүтэ буолан, туох баарын барытын киллэрээччитэ-таһаарааччыта, ылан биэрээччитэ эбит.
Сайаан манна бастакытын өссө 8-с кылааска үөрэнэ сылдьан кэлэ сылдьыбыта. Билигин көрдөххө, быдан улааппыт, ону кытары көрдөрөр нүөмэрдэрэ эмиэ уустугурбуттар. Нууччалыы, сахалыы икки тылынан иҥнигэһэ суох саҥаран-иҥэрэн биир-биир дьиктиргэтэр нүөмэрдэрин хааһахтан хостуур кэриэтэ таһааран истэ. Дьиктиргээн харахтара чаҕылыҥнаспыт оҕолор фокусник хас биирдии хамсаныытын кыраҕытык манаатылар. Уу-чуумпутук, мэктиэтигэр тыыммакка да олорон көрдүлэр – сөхтөхтөрүнэ соһуйаллар, үөрэллэр, ол аайы ытыстарын таһынан биһирээбиттэрин биллэрэллэр.
Саамай хорсун үс оҕо ыҥырыллан тахсан барыта илэ-чахчы буоларын бэйэлэрэ тутан-хабан көрөн итэҕэйдилэр. Клоун кыһыл муннун ытыһыгар кытаанахтык бобо туппут кыыс Сайаан «биир, икки, үс!» диэбитигэр ыыппыта биир мунну биэс буола элбээбититтэн олус соһуйда уонна күллэ. Атын кыыс кураанах иһиккэ хоруолук хайдах баар буолан хаалбытын өйдөөбөккө да хаалла уонна наһаа үөрдэ, хоруолугу көтөҕөн ылан дьоллонно. Аны кыра уол тахсан, фокусник хайыта тыыппыт кумааҕыта силбэһэн панама буолан кини төбөтүгэр оруобуна олорбутуттан саҥата суох барда уонна ону күндү ыалдьыт киниэхэ бэлэхтээбититтэн наһаа астынна.
Түмүккэ ытыс тыаһа өргө диэри уҕараабата, тоҕо диэтэххэ, оҕолор хаһан даҕаны көрбөтөхтөрүн көрөн олус үөрдүлэр-көттүлэр, аптаах уолчааны бары сөбүлээтилэр, сэдэх дьоҕуругар ымсыырдылар. Баҕар биир эмэ оҕо хаһан эмит бу үтүө холобуру үтүктүө турдаҕа. Эчи, туттара-хаптара үчүгэйин, быһаарара, кэпсиирэ эриэккэһин, күлэрэ-үөрэрэ күндүтүн! Чахчы бэйэтигэр киһи болҕомтотун тардар күүстээх уол Сайаан дьоҕуру оҕо эрдэхтэн эрчийдэххэ ситиһиилээх буолуохха сөбүн оҕолорго көрдөрө сылдьарын хайгыыбыт, махтанабыт уонна ситиһиилэри баҕарабыт!
Светлана Бурцева, уопсас. кэрэсп.