Өспөх нэһилиэгин олохтоохторо хаһыс да сылын олус тымныы культурнай-спортивнай комплекс (КСК) дьиэтигэр отчуоту истэ мустар. Былырыын бу саала өрөмүөнүгэр улуус бүддьүөтүттэн тутуу матырыйаалын атыылаһарга 500 тыһыынча солкуобай көрүллүбүтэ. Онон быйыл өрөмүөнүн саҕалыыр былааннаахтар. Аны ол үлэтигэр көмөлөһөргө көрдөстүлэр.
Оҕо саадын дьиэтэ эмиэ тымныытынан биллэр. Онно өрөмүөн үлэтин туруорсаллар. Оскуолаҕа интернет мөлтөҕө эмиэ биллэр. Оҥоро сатаабыттара кыаллыбатах. Онон быйыл «Ростелеком» нөҥүө сибээһи тупсарыыга үлэлэһиэхпит диэн үөрэх управлениетын начальнига Степан Литвинцев хардарда. ЕГЭ, ОГЭ ыытыыга эрэйи көрсөллөр эбит. Аны кырыы сытар нэһилиэк буолан, улуус киинигэр киириигэ эмиэ күчүмэҕэйдэрдээх. Онуоха эксээмэни тутар пуун үлэлиэҕэ диэн эттэ.
Ынах төбөтүгэр көрүллэр 39 тыһ. солк. көмө харчы отчуота кыаллыбата этилиннэ. Ол харчыны хаһаайыстыбаны сайыннарарга, үлэҕэ-хамнаска, уматыкка туттан баран төлөбүр чегын көрдүүллэрэ табыгаһа суоҕун ыйдылар. Ол кыһалҕаны быһаарарга көрдөстүлэр.
Айан суолун кэмигэр астаран иһэри туруорсаллар. Онуоха маннык ыраах грейдер айанныыра эмиэ ыарахаттардааҕынан , миэстэтигэр үлэлиэн баҕалаах киһини кытта дуогабардастахха улахан көмө буолуоҕун эттилэр.
Түмүк. Өспөх нэһилиэгэр былырыын улуус бүддьүөтүттэн 3 мөл. 400 солк. көрүллэн, үгүс үлэ быһаарыллыытыгар үтүмэн көмө буолбутугар нэһилиэк баһылыга Лена Свешникова уонна олохтоохтор махтанныларКырыы сытар нэһилиэккэ болҕомто аччаабатыгар баҕа санааларын эттилэр. Итиэннэ улуус дьаһалтатын ааспыт сыллааҕы үлэтин сөптөөҕүнэн сыаналаатылар.
Ольга Шепелева