Дүпсүн нэһилиэгин олохтоохторугар бүгүн үөрүүлээх күн тосхойдо. “Хаарбах туруктаах дьиэттэн көһөрүү” федеральнай программанан тутуллубут сырдык, сылаас үс этээстээх таас дьиэҕэ киирэр, квартираларын күлүүһүн тутар үөрүүлээх тэрээһин бар дьону түмтэ. Дьиэни “Дохсун” ХЭТ (дириэктэр Арсен Ермолаев) 2023 сылтан саҕалаан тустаах болдьоҕор киллэрдэ.
Үгэс буолбут түгэҥҥэ тутуу түмүктэммитин бэлиэтиир күлүүһү нэһилиэк баһылыгар Николай Сивцевкэ тутуу тэрилтэтин салайааччыта Арсен Ермолаев ытыс дохсун тыаһын ортотугар туттарда. Итиэннэ саҥа дьиэ олохтоохторугар квартираларын күлүүһүн нэһилиэк баһылыга Николай Сивцев, улуус баһылыгын солбуйааччы Анатолий Сторожев, “Дохсун” ХЭТ дириэктэрэ Арсен Ермолаев, СӨ дьиэ-уот надзорун уонна государственнай тутуу управлениетын салайааччыта Павел Аргунов туттардылар.
Үтүө тэрээһиҥҥэ нэһилиэк баһылыга Николай Николаевич махтал, эҕэрдэ тылларын анаата, “Дүпсүн нэһилиэгин социальнай-экономическай сайдыытыгар кылаатын иһин” бэлиэнэн дьиэ тутуутугар үлэлээбит олохтоохтору Семен Акимовы, Иван Федоровы, бэдэрээччити Арсен Ермолаевы наҕараадалаата.
Хаарбах туруктаах 8 уонна 12 квартиралаах дьиэттэн көспүт олохтоохтор үөрүүлэрэ муҥура суох. Ордук аҕам саастаах дьон кырдьар саастарыгар толору хааччыллыылаах таас дьиэҕэ олорор үөрүүлэммиттэриттэн толору дьоллоохтор.
Ольга Шепелева