Володя 1995 сыллаахха от ыйын 4 күнүгэр Мүрү нэһилиэгэр олорор Евдокия, Николай Баишевтар дьиэ кэргэннэригэр үһүс оҕонон, күүтүүлээх бастакы уол оҕо буолан төрөөн ийэлээх аҕатын дьоллообута. Икки эдьиийдээх уонна бырааттаах, балтылаах. Мүрүтээҕи «Сардаана» оҕо тэрилтэтигэр уһуйуллан, Мүрү 1-гы №-дээх орто оскуолатыгар, «Уолан» гимназияҕа үөрэнэн Мүрү алаас туонатыгар көҥүл көччүйэн улааппыта. Кинилэр дьиэ кэргэн хаартыскаларынан көрдөххө, Баишевтар уол оҕону үлэҕэ, спортка сыһыаран, булка, айылҕаҕа тапталы иҥэрэн, ийэ-аҕа сылаас тапталынан угуттаан олус үчүгэйдик ииппиттэрин тута бэлиэтиигин.
Володя оскуола кэмигэр үөрэҕи, спорду дьүөрэлээн, оскуола, улуус, өрөспүүбүлүкэ иһинэн ыытыллар тэрээһиннэргэ көхтөөхтүк, ситиһиилээхтик кыттара. Гимназияҕа үөрэппит учууталлара, Оҕо успуордун оскуолатын тириэньэрдэрэ, доҕотторо кинини сахалыы дириҥ толкуйдаах, кэпсэтинньэҥ, бэһиэлэй, элэккэй майгытын, ылсыбытын ыпсарар, санаабытын ситиһэр үгэстээх, тулатыгар куруук элбэх доҕордоох буолара диэн бэлиэтииллэр. Ордук гимназияҕа да киирэр эксээмэни ааһаары төһөлөөх туруулаһан, дьаныһан туран ситиспитин сөҕөллөр. Кини гимназия бастакы дириэктэрин Валентин Филипповы холобур оҥосторо, олус убаастыыра, киэн туттара.
Саахымакка өрөспүүбүлүкэтээҕи турнир. 2007 с.
Маҥнайгы кылаастан Михаил Ильич Ушницкайга саахымакка, 2006 сылтан Алексей Иннокентьевич Тарскайга футболга умсугуйан дьарыктаммыта. Тириэньэрдэрэ кини дьаныардаахтык дьарыктаммытын, бу икки көрүҥҥэ чахчы дьоҕурдааҕын туһунан этэллэр.
Владимир 9-с кылаас кэннэ салгыы Дьокуускайга гуманитарнай хайысхалаах өрөспүүбүлүкэтээҕи интэринээт лицейгэ үөрэммитэ. Онтон 2013 сыллаахха ХИФУ Историческай салаатыгар үөрэнэ киирбитэ. Үөрэнэ сырыттаҕына 2017 сыллаахха Владимиры аармыйаҕа ыҥыраллар. Онно Приморскай кыраайга инженернай-сапернай полкаҕа сулууспалыыр. Онно сылдьан анал үөрэҕи ааһан, Владивосток куоракка буолбут экономическай форумҥа эбийиэги харабыллыыр, тэрээһин иннинэ анал үөрэхтээх ыттарынан эстэр эттиги бэрэбиэркэлииргэ үлэлэспиттээх.
Аармыйа кэннэ дойдутугар кэлэн өр буолбакка, оҕо сааһын баҕатын толороору, оскуолаҕа үөрэммит кэмигэр бастыҥ спортсмен быһыытынан сынньаммыт Бүтүн Россиятааҕы «Океан» лааҕырыгар баһаатайынан үлэлиир. Таһаарыылаахтык үлэлии сырыттаҕына хоруона хамсыга кэлэн Сахатын сиригэр төннөр. Владимир төннөн кэлэн, устудьуоннар тутар этэрээттэригэр Сунтаар улууһун Куокуну нэһилиэгэр үлэлии сылдьан билсибит кыыһынаан – Жанна Петровалыын 2020 сыллаахха ыал буолар дьолу билэр. Ол устудьуон сылларыгар төннөн кэпсээн аһардахха, тутуу этэрээтигэр үлэлии сылдьан Владимир атаҕын оһоллоон балыыһаҕа тиийэр. Онно медик кыыс Жанна көрсөн уол эчэйиитин эмтээн үтүөрдэр. Эдэр ыаллар уол оҕолонон Андрей диэн сүрэхтииллэр. Ыал буолан баран, Владимир Николаевич Ис дьыала уорганыгар силовой структураҕа үлэлиир.
Ийэтэ кэпсииринэн, Аҕа дойду сэриитигэр хорсуннук кыттыбыт эһэлэрдээх, таайдардаах уол кыра сааһыттан сэрии тиэмэтин олус интэриэһиргээн улааппыт. Устудьуоннуур кэмигэр дойдубут ааспыт ыар сылларын сыныйан үөрэппитэ. Ол да иһин киниэхэ патриотическай тыын оҕочоос сааһыттан күүстээхтик иҥмитэ. Ол санаатынан салайтаран Владимир балаҕан ыйын саҥата, 2022 сыллаахха анал байыаннай дьайыыга баҕа өттүнэн барарга быһаарынар. Чугас дьоно төһө да ыытыахтарын баҕарбатахтарын иһин, эппит тылын энчирэппэт эр киһи тылын төттөрү эҕирийбэтин өйдөөбүттэрэ.
2022 сыл Кыайыы күнүгэр «Эр санааланыы» уордьанын дьиэ кэргэнигэр туттарыы
Владимир Тихоокеанскай флот 155 морской пехота гвардейскай биригээдэҕэ снайперынан сулууспалаабыта. Үгүс кыргыһыыга эйэлээх олохтоохтору быыһаабыттарын туһунан кэпсиирэ. «Хайаан да эргиллиэм», – диэхтиирэ. Ол эрээри, 2022 сыл сэтинньи 7-с күнүгэр эдэркээн уол Донецкай народнай өрөспүүбүлүкэ көмүскэлигэр Павловка диэн сэлиэнньэҕэ сырдык тыына быстыбыта. Кини «Горец» диэн позывнойдаах доҕорун кытта кыргыһыы кэмигэр бааһырбыт доҕотторун быыһыы сылдьан артиллерия ытыалааһыныгар түбэһэллэр. Биир түгэҥҥэ Владимир соһон испит саллаатын эт бэйэтинэн хаххалыы түһэн, снаряд кыырпахтарын бэйэтигэр толуйар. Доҕоро «Горец» мүччү туттаран туора ыстанан, тыыннаах ордон итини кэпсээбитэ.
Бу сирдээҕи олоххо туох эрэ күүстээх, дьикти ситим баар. Ийэтэ Евдокия Андреевна ол күн киэһэ дьуһуурустубатыгар докумуонун толоро олордоҕуна, уолун хаартыската иннигэр илэ-чахчы устан ааһар уонна хап-хара иччитэхсийбит хонуу көстөн ылар. Ийэ киһи тута: «Оҕобун сиэтилэр!» – дии түһээт, сүрэҕэ субу тохтоон хаалыахтыы күүскэ битийэр.
Кэнники санаан көрдөҕүнэ, ити оруобуна уолун сырдык тыына быстар түгэнин бириэмэтэ түбэһэр эбит. Сарсыныгар, 8-с чыыһылаҕа, Владимир кырачаан уола икки сааһын туолбута. Ол күн аҕаларыттан эҕэрдэ күүппүттэрэ даҕаны биллибэтэҕэ…
Кэлин ийэтигэр Владимир төлөпүөнүн аҕалбыттарын кэннэ бүтэһик хаартыскатын көрөн, чугас дьонун сүрэхтэрэ төһөлөөх күүскэ нүөлүйбүтэ буолуой? Владимир тиһэх күнүн иннинэ буулдьанан «С днем рождения 2» диэн суругу суруйан баран, бүтэһиктээхтик хаартыскаҕа түһэн бэлэмнээбитин тута харааста өйдөөбүттэрэ. Ийэ киһи этэр ээ: «Уолбут барахсаны аһыйбатах, ахтыбатах, ытаабатах күммүт суох», – диэн.
Хорсун саллаат, биир дойдулаахпыт сырдык аата судаарыстыбаннай наҕарааданан – «Эр санааланыы» уордьанынан бэлиэтэммитэ. Бу 2022 сыл сэтинньитигэр аҕыйахтыы күн быысаһа-быысаһа улууспут үс хоһуун уолбутун сүтэрбит ыар сүтүктээхпит. Дойдубут чиэһин көмүскүүр байыаннай дьайыыга сырдык тыыннарын толук уурбут Гаврил Попов, Василий Данилов уонна Владимир Баишев хорсун быһыылара умнуллубатын, дойдубут сырдык кэскилинэн кэрэһэлэнэ турдун!
Мария Аргунова