Советскай норуот фашистскай Германияны Аҕа дойду Улуу сэриитигэр итэҕэтиилээхтик кыайбыта эһиил лоп курдук 80 сылын туолар. Сыл – хонук, илим хотоҕоһунуу устан истэҕин аайы биһиги аҕаларбыт, ийэлэрбит хаан тохтуулаах, тоҥуулаах-хатыылаах, аччыктааһыннаах, олоҕу толук ууруулаах аҕалбыт Улуу Кыайыылара умнуллан хаалбатар хайдах, кыра да өйдөбүлү хаалларбыт киһи диэн маннык ахтыылары, кэриэстэбиллэри оҥоро сатыыбыт.
Чэриктэй Алданын сиригэр, Маалы үрэххэ сэттэ ини-бии уолаттар, икки аҕас-балыс Шелковниковтар төрөөн-ууһаан олорбуттар. Колхозтааһын саҕана бары алаас сирдэргэ көһөн киирэн, ыал буоланнар, улуус араас нэһилиэктэринэн тарҕаһан олордохторуна, 1941 сыллаахха Германия ньиэмэс өстөөхтөрө Аан дойдуну атыйахтаах уу курдук үнтү ытыйан сэриинэн саба түспүттэрэ. Манна алта ини-бии Гаврил, Роман, Егор, Федор, Прокопий, Михаил Шелковниковтар биир-биир дойдуларын көмүскүү туруммуттара. Улахан убайдара Миитэрэй промкомбинакка броньнаах буолан сэриигэ ыҥырыллыбатаҕа.
Дьылҕа-хаан үчүгэй хараҕынан көрөн алта бырааттартан биэһэ элбэх баастаах-үүттээх да буоллаллар, дойдуларыгар тыыннаах эргиллэн кэлбиттэрэ. Эргиллэн кэлээт дойдуну чөлүгэр түһэриигэ күүстэрин- уохтарын ууран үлэ үөһүгэр түспүттэрэ. Бэйэлэрин кэннилэриттэн үгүс ыччаты хаалларан, дьоһун олоҕу олорон ааспыттара. Улахан убайдара Миитэрэй, балтылара Дария, Александра бэйэлэрин харыстаммакка тыылга Улуу Кыайыыны уһансыбыттара.
Бу ытык дьоммут үтүө ааттарын үйэтитэр санааттан киллэрбит этиибин Уус Алдан улууһун дьаһалтата уонна улуус ытыыга федерацията, бары аймахтар өйөөннөр, быйыл кулун тутар 23 күнүгэр бырааттыы Шелковниковтар бириистэригэр буулдьанан ытыыга биирдиилээн уонна хамаанданан бастыыр иһин улуустааҕы күрэхтэһии аан бастакытын Бороҕон сэлиэнньэтигэр Н.Н. Тарскай аатынан спорт дыбарыаһыгар ыытыллыаҕа.
Онон Аҕа дойду көмүскэлигэр күүстэрин-уохтарын биэрбит ытык дьоммут ааттара ааттанарыгар бары түмсэн, бу күрэхтэһиини ситиһиилээхтик ыытыахха.
Күрэхтэһии балаһыанньатын манна көр.
Валерий Шелковников, Уус Алдантан төрүттээх Нам улууһун Хатырык сэлиэнньэтин ытык олохтооҕо, ИДьМ туйгуна