В.В. Алексеев аатынан Мүрүтээҕи уолаттар гимназияларын бастыҥнарын чиэстиир “Добун–2024” бириэмийэни туттарыы ыам ыйын 7 күнүгэр В.В. Никифоров аатынан «Тойон Мүрү» култуура дыбарыаһыгар үрдүк таһымнаахтык ааста.
Быйылгы “Добун” бириэмийэни туттарыы саха норуотугар үөрэх-билии иҥэрин туһугар дьоһун олоҕун анаабыт, саха оҕотугар математиканы дириҥэтэн үөрэтии кэскиллээх суолун арыйсыбыт, киэн туттар биир дойдулаахпыт В.В. Алексеев төрөөбүтэ 100 сылыгар ананна.
Үөрүүлээх тэрээһини кэргэннии учууталлар Людмила, Арыйаан Спиридоновтар, Розалия, Ньургун Готовцевтар, Мария, Иннокентий Жирковтар иилээн-саҕалаан ыыттылар.
«Добун -2024» бириэмийэҕэ уопсайа 64 гимназист үөрэх араас предметтэригэр номинант аатын сүктүлэр. Кинилэр ортолоругар политехническай, гуманитарнай уонна естественнэй предметтэр бастыҥнарын 90 номинациянан чиэстээтилэр.
Сыл бастыҥ гимназистарыгар «Чыпчаал» үрдүк аатын туттардылар, ол курдук «Добун» бириэмийэни төрүттээччи – история учуутала Валерий Рожин 2023-2024 үөрэх дьылын түмүгүнэн сыл бастыҥнарынан 11 «б» кылаас үөрэнээччитэ Дуолан Гаврильевы, 9 «а» кылаас үөрэнээччитэ Володя Гороховы ааттаталаата.
Мүрүтээҕи уолаттар гимназияларын үөрэнээччилэрэ, билии кынатыгар олорсон, киэҥ суоллары арыйан өссө да үрдүк ситиһиилэри дабайа туруҥ!
Үөрүүлээх тэрээһин ыалдьыта саха эстрадатын сулуһа Джида оҕолору эҕэрдэлээтэ.
Мария Жиркова