Бүгүн улуус оскуолаларыгар 2023-2024 үөрэх дьылын түмүктүүр тиһэх чуораан чугдаарда. Мүрү 1-гы №-дээх орто оскуолатын быйылгы үөрэх дьылын барыта 686 оҕо түмүктээтэ, ол иһигэр 11-с кылааһы – 32 оҕо, 9-с кылааһы 60 оҕо бүтэрдэ.
Өссө биир дьаныардаах, үгүс ситиһиилээх үөрэх дьыла түмүктэммитинэн эҕэрдэ тылы улуус баһылыга, бу оскуола 1985 сыллааҕы выпускнига Василий Аммосов эттэ. Кини быйыл оскуоланы бүтэрэр оҕолорго болуотунньук идэтиттэн улуус баһылыгар тиийэ үүнэн тахсыбытын кэпсээн, билиҥҥи олоххо техническэй хайысхалаах идэлэр олус наадалаларын этэн, онно болҕомтолорун ууралларыгар сүбэлээтэ, талбыт идэлэрин баһылаан төрөөбүт улууспут сайдарын туһугар үлэлии кэлэллэригэр баҕа санаатын тиэртэ. Эҕэрдэ тылы итиэннэ Мүрү дьаһалтатын баһылыга Прокопий Румянцев, үөрэх салалтатын начаалынньыга Степан Литвинцев, оскуола дириэктэрэ Петр Баханов эттилэр.
Буоларын курдук, үөрүүлээх тэрээһиҥҥэ болҕомто чуолаан оскуоланы бүтэрээччилэргэ уурулунна. Үөһээ этиллибит тыл этээччилэр уонна Ил Түмэн депутата Геннадий Васильев тус ааттарыттан үчүгэй үөрэхтээх, ситиһиилээх выпускниктарга стипендия туттардылар. Итини таһынан РСФСР, САССР үтүөлээх учуутала Ия Рыбкина аатынан, педагогическай династия аатыттан бэтэрээн учуутал Анатолий Никифоров уонна оскуола дириэктэрин солбуйааччылар, учууталлар, методхолбоһуктар эмиэ бастыҥ выпускниктарга стипендиялары анаатылар.
Түмүккэ оскуоланы бүтэрээччилэр ааттарыттан тыл эппит Долун Жирков оскуолатааҕы сылларбыт олус үчүгэйдик аастылар диэн туран, күндү төрөппүттэригэр, үөрэппит учууталларыгар, бииргэ үөрэммит доҕотторугар ис дууһатыттан махтаммытын кэлбит дьон долгуйа иһиттилэр, дохсун ытыс тыаһын анаатылар. Тэрээһин үгэс быһыытынан выпускниктар үҥкүүлэринэн түмүктэннэ.
Мария Аргунова