Республика Ис дьыалаҕа министерствотын 430№-дээх бирикээһигэр олоҕуран, олунньу 25-26 күннэригэр Дьокуускайтан анал тэриллибит этэрээт кэлэн, улууспутугар нэһилиэнньэни буруйтан-сэмэттэн сэрэтэр, өйдөтөр сыаллаах үлэлээн бардылар.
Бу икки күҥҥэ анал маршруттар оҥоһулланнар, түөрт хайысханан улуус улахан нэһилиэктэрин хабан, суол быраабылатын быһаарыыттан, өйдөтүүттэн саҕалаан дьиэлэринэн кэрийэн үлэлээтибит. Маны тэҥэ олохтоохтору түөкүттэргэ уонна киберпреступность дьаллыктарыгар киирэн биэрбэттэрин туһугар өйдөтөр-сэрэтэр хайысхалаах үлэни алта тэрилтэҕэ 129 киһини хабан ыыттыбыт. Бу көрсүһүүлэргэ түөкүннээһинтэн сэрэтэр 210 буклеты туттардыбыт.
Итини таһынан бултуур саа-саадах сөптөөхтүк харайыллыытын көрүү, саанан-саадаҕынан ыар хайысхалаах буруй-сэмэ тахсыбатын туһугар үлэ ыытылынна.
Араас көрүҥнээх буруйу-сэмэни оҥорон ИДьО-гар учуокка турар, итирдэр утахтары иһэн уопсастыбаннай бэрээдэги кэһэр, дьиэҕэ-уокка айдаарар, дьиэлэригэр дьону мунньан арыгылааһыны тэрийэр, хаайыыттан босхолонон кэлбит административнай надзорга турар, буруйу оҥорон кэтээн көрөр болдьоххо сылдьар барыта 52 киһини кытары иитэр-өйдөтөр, сэрэтэр, көнө суолга туһаайар хайысхалаах үлэ тэрилиннэ.
Бэрэбиэркэлиир үлэ кэмигэр 832 олорор дьиэ көрүлүннэ. Ону таһынан улууспутугар итирдэр утахтары атыылыыр 6 маҕаһыыҥҥа бэрэбиэркэ буолла. Онуоха икки маҕаһыыҥҥа акцизнай мааркалара сөп түбэспэккэ, 1 280 лиитэрэ итирдэр утах атыыттан туоратылынна, тустаах уорганнар көрүүлэригэр бэрилиннэ.
ГАИ линиятынан 132 массыына бэрэбиэркэлэннэ, онтон 41 суоппарга араас хайысханан административнай боротокуол толорулунна.
Маны таһынан саалаах 210 киһи олорор дьиэлэринэн бэрэбиэркэлэннилэр. Сааны илдьэ сылдьыыга уонна харайыыга сокуону кэһиилэр баалларынан, 5 киһиэхэ административнай боротокуол туолла, 6 саа былдьанна, 2 киһи сааны көҥүлэ суох, сокуону кэһэн булуммуттара биллэн, холуобунай буруй састааптара бааллара көстөн, холуобунай процессуальнай кодекска олоҕуран салгыы бэрэбиэркэҕэ ыытылыннылар.
Инникитин даҕаны маннык хабааннаах үлэни тиһигин быспакка ыытыы былааҥҥа киирдэ.
Уус Алданнааҕы ИДьО участковайдарын уонна сокуоннай саастарын ситэ илик оҕолорго отделениетын сулууспата