Сирияны, Ливияны, Орто Африканы уонна анал байыаннай дьайыыны ааспыт, сэрии алдьархайын этинэн-хаанынан билбит, модун санаалаах саха хамандыыра, Россия Дьоруойа Александр Егорович Находкины бүгүн улуус баһылыга Василий Алексеев салалталаах улуус дэлэгээссийэтэ арыылаах алаадьынан айах тутан көрүстэ.
Дьоруой бүгүн Тумулга, улуус киинигэр нэһилиэнньэни, байыаннай дьайыы кыттыылаахтарын көрсөр, бэлиэ миэстэлэри кытта билсэр соруктаах.
Александр Егорович буор куттаах, өбүгэ ситимнээх киһи. Кини аҕатын өттүнэн Бороҕон Сыҥааҕыттан, саха омук судаарыстыбаннаһын түстээбит, бөдөҥ уопсастыбаннай-политическай деятель Сэһэн Ардьакыаптан сыдьааннаах. Ийэтин өттүнэн Аҕа дойду Улуу сэриитин албан ааттаах буойуттара, хорсун-хоодуот Александр уонна Михаил, Сэбиэскэй Сойуус Дьоруойа Николай Чусовскойдартан төрүттээх.
Донбасска нуучча норуотун дьылҕата быһаарыллар кэмигэр кини туора турбатаҕа. Бэйэтин баҕатынан норуотун көмүскүүр сыаллаах народнай ополчениеҕа барбыта. Мантан саҕаламмыта уһун унньуктаах бойобуой суола. Сирияҕа, Ливияҕа, Киин Африкаҕа тиийэ сылдьан кини өлүү дьуоҕатыттан мүччү туттаран, хаста даҕаны иккис тыыннаммыта.
Бахмут иһин кырыктаах кыргыһыыга хамандыырдарын сүтэрбиттэригэр, Александр Егорович уолуйбакка, взводу, онтон 1300 кэриҥэ киһилээх ротаҕа тиийэ салайбыта. Кини сатабыла, модун санаата уонна байыастарын туһугар кыһамньыта кыайыыны аҕалбыта. Ол иһин кинини «Эр санаа» үһүс уордьанынан, «Хорсунун иһин» иккис мэтээлинэн бэлиэтээбиттэрэ.
Бүгүн кини – Арассыыйа Дьоруойа, норуот киэн туттуута.
Дьоруой Тумулга Кыайыы болуоссатыгар сибэкки дьөрбөтүн ууран баран, олохтоох кулуупка нэһилиэнньэни кытта көрүстэ. Тумуллар Дьоруой уолларын сүһүөхтэрин үрдүгэр туран уруйдуу-айхаллыы, киэн тутта көрүстүлэр. Олохтоох дьаһалта баһылыга Константин Копырин баҕа санаатын, эҕэрдэтин этэригэр Александр Находкиҥҥа убаһа бэлэхтиирин иһитиннэрдэ.
Оттон Александр Егорович Тумул бөһүөлэгин олохтоохторугар:
– Мин Тумулу дойдум диирим оруннаах. Оҕо сааһым кэрэ сайыннара манна ааспыттара. Хаан-уруу аймахтарым манна олороллор. Дьоруой буолар – эппиэтинэс. Мин ыччат, бүтүн норуот иннигэр эппиэтинэстэнним. Барыта ыра санааттан саҕаланар. Ыччакка туһулаан ыра санааланыҥ, олоххо чопчу сыалланыҥ диэн этэбин. Инникитин Уус Алдан улууһугар, Тумулга көмөлөһөр санаалаахпын. Өрүү бииргэ тутуһан сылдьыах,
– диэн санаатын тиэртэ.
Улуус дьаһалтатын пресс-сулууспатын уонна «Мүрү саһарҕата» хаһыат Мах-ханаалларын матырыйаалларынан