Улууспутугар дьиэ кэргэҥҥэ аналлаах ый ыытылла турар. Ол чэрчитинэн алтынньы 28 күнүгэр Николай Тарскай аатынан спортивнай уораҕайга дьиэ кэргэттэргэ «Вместе по кругу» диэн улуустааҕы II күрэс буолан ааста.
Дүпсүн, Мүрү, I Өспөх уонна Лөгөй нэһилиэктэриттэн 13 дьиэ кэргэн кэлэн көхтөөхтүк кытынна. Тэрийээччилэринэн элбэх тэрилтэ, түмсүү үлэлэстэ: үөрэх улуустааҕы управлениета, оҕону эбии үөрэхтээһин киинэ, Егор Габышев аатынан оҕо спортивнай оскуолата, С.С. Васильев – Борогонскай аатынан улуустааҕы киин уонна оҕо бибилэтиэкэлэрэ, Уус Алдан дьахталларын сүбэтэ, дьиэ кэргэн уонна ыччат политикатын улуустааҕы управлениета, «Россия ийэлэрэ» хамсааһын улуустааҕы салаата.
Күрэс түөрт түһүмэҕинэн ыытылынна: «Таба тап» дартс күрэһэ уонна мындыр өйгө, билиигэ-көрүүгэ аналлаах станциялар. Уопсай түмүккэ «Таба тап» дартс уонна түөрт оонньуу түмүгүнэн бастакы миэстэни Мындаабаттан Кирилловтар дьиэ кэргэн (иккис сылын), иккис миэстэни Майаҕастан Андросовтар, үһүс миэстэни Мындаабаттан Третьяковтар ылан кыайыы кынаттаннылар.
Түһүмэх аайы кыайыылаахтар ааттаннылар: «Тобул» логическай оонньууга бастакы миэстэни Федоровтар (Уһун Күөл), иккис миэстэни Васильевтар (Мындааба), үһүс миэстэни Васильевтар (Майаҕас) ситистилэр; «Өркөн өй» түһүмэххэ бастакы миэстэни Андросовтар (Майаҕас), иккис миэстэни Федосеевтар (Чараҥ), үһүс миэстэни Татариновтар (Кэптэни) ыллылар; «Сымса өй» түһүмэххэ бастакы миэстэни Федосеевтар (Чараҥ), иккис миэстэни Андросовтар (Майаҕас), үһүс миэстэни Колодезниковтар (Бороҕон) ылылар.
Былырыыҥҥы күрэхтэһиини кытта тэҥнээтэххэ, кыттааччы ахсаана, ордук кыра саастаах оҕолор кыттыылара элбээбит. Күн устата дьиэ кэргэттэр бииргэ сылдьан, атын ыаллары кытта билсэн, кэпсэтэн, бэйэлэригэр умнуллубат кэрэ-бэлиэ күнү бэлэхтээбиттэригэр эрэнэбит.
Мария Винокурова, “Оҕо саас сирдьиттэрин” улуустааҕы координатора