Хомустаахха сааһырбыттар декадаларын түмүктүүр тэрээһиҥҥэ Кэптэнитээҕи “Аал уот” түмсүү ыалдьыттаатыбыт. Уус-уран салайааччы Зинаида Бурнашева, библиотекарь Варвара Гоголева истиҥ көрсүүлэрин кэнниттэн үүттээх чэйдээх, минньигэс астаах остуол тула олорон икки бөһүөлэк аҕам саастаахтара ааспыты ахтан-санаан кэпсэтэн, оонньоон, күлэн оҕо сааспытыгар түһэн ыллыбыт.
Сынньалаҥ киинин дириэктэрэ Анна Бечеканова кэрэ куолаһынан эҕэрдэтин тиэрдэн,бастакы тылы “Чагда” сааһырбыттар түмсүүлэрин салайааччыта Альбина Дягилеваҕа биэрдэ. Салгыы Кэптэниттэн “Аал уот” түмсүүттэн сааһырбыттар декадаларын устата улуус үрдүнэн элбэх үлэ барбытын билиһиннэрэн, маннык тэрээһиннэр сааһырбыт дьоҥҥо көдьүүстээхтэрин бэлиэтээн, түмсүү аатыттан эҕэрдэ суругу, Лөгөй нэһилиэгин сувенир тэриэлкэтин Альбина Дягилеваҕа туттардым. Салгыы Анна Бечеканова, Варвара Гоголева араас дьикти өй оонньууларын оонньоттулар, таабырыннары, сэбиэскэй кэминээҕи киинэлэри, мелодиялары таайтардылар, араас хамсаныылаах оонньуулары ыыттылар.
Мааны остуол бастакы тылын 80 сааһын соторутааҕыта туолбут сэбиэскэй, партийнай салайааччы, холкуос, сопхуос үлэтэ тыа хаһаайыстыбатыгар үрдүк көрдөрүүлээх буоларыгар дьоһун кылаатын киллэрсибит Уус Алдан улууһун, Лөгөй нэһилиэгин бочуоттаах олохтооҕо, өрөспүүбүлүкэ ытык кырдьаҕаһа Петр Попов эттэ, эбиитин олус үчүгэйдик эдэр сааһын ырыаларын ыллаан сэргэхситтэ. Кэптэниттэн “Аал уоту” үс сыл үрдүк таһаарыылаахтык салайбыт Агафья Перевалова эҕэрдэ тылын этэн, көрдөөх ырыанан доҕуһуоллаан үөртэ.
“Сандалым салаата” күрэскэ Мария Алексеева – 1-кы, Елена Новгородова 2-с миэстэни ыллылар. Ваза оҥоруутугар Мария Татаринова бастаата, иккиһи – Ульяна Белолюбская, үсүһү Мария Алексеева ылан үөрдүлэр.
Эдэр саас ретро муодатыгар Ульяна Бурнашева 1-кы үрдэл буоллум,Ульяна Белолюбская – 2-с үрдэл,Фаина Бурнашева 3-с үрдэл буоллулар.
Онтон спортивнай оонньуу көҕү тутта. Мээчиги табан киллэриигэ Екатерина Охлопкова тэҥнээҕин булбакка бастаата, Галина Олесова иккис буолла.
Киинэлэри, ырыалары таайыыга Мария Татаринова, Агафья Перевалова, Марфа Попова, биэлсэр Марианна Дегтярева сытыы,түргэн өйдөрүн көрдөрдүлэр. “Биэчэр королевата” аат Мотрена Готовцеваҕа ананна. Суоппарбыт Артур Новгородов Индия таҥаһын таҥнан музыкальнай инструменнарыгар оонньоон соһутта. Эбиитин араас омук флейталарыгар маастар-кылаас ыытан сөхтөрдө. Ити курдук олус үчүгэйдик сынньанан хардарыта махтал тылларын этэн тарҕастылар.
Ульяна Бурнашева, “Аал уот” түмсүү салайааччыта