Хас биирдии киһи күнэ социальнай ситими көрүүттэн саҕаланар. Бу – дойдуга туох буола турарын интернет сонуннарыттан ааҕан билэрбит олохпут чахчыта буолла. Онуоха ордук ыччат дьонтон «кумааҕы хаһыат туохха нааданый? Интернеккэ ааҕабыт» диэни элбэхтик истэбит.
Аныгы олох сиэринэн биһиги хаһыаппыт электроннай көрүҥҥэ эмиэ күүскэ үлэлиир. Ол курдук, Мах, Вконтакте сыһыарыыларга, саайтка күннэтэ тахсар сонуннарбытын ааҕаҕыт.
Оттон кумааҕы хаһыат соругунан төрөөбүт тылы харыстааһын, өйү-санааны иитии, буолбуту историяҕа үйэтитии буолла.
Тыл – тыыннаах, хамсыыр эйгэ. Төһөнөн элбэх сахалыы таһаарыы баар да, соччонон төрөөбүт тыл туттуллар эйгэтэ киэҥ буолар. Аан дойду үрдүнэн киһи-аймах быыһык кэмҥэ олорор, ол – сыыппараҕа көһүү. Бу хамсааһыҥҥа мэлиллэн, урут илиибитигэр ылар кумааҕы харчыбыт электроннай картаҕа көспүтүн курдук, хаһыат суох буолуо диэн санаа биһигини, хаһыаччыттары, улаханнык долгутар. Кумааҕы хаһыат төрөөбүт тылы харыстыыр, тылы кытта быһаччы ситимнээх буолан, тылбыт сүтүөн сөп.
Онон кумааҕы таһаарыыны (хаһыат, сурунаал, кинигэ) сүтэрии, бүтүннүү сыыппараҕа көһүү ордук аҕыйах ахсааннаах норуокка биһиэхэ, сахаларга, улахан охсуулаах буолуоҕа.
Сурутуу хампаанньата биһиэхэ көхтөөхтүк саҕаланна. Ол курдук, хаһыаты таптаан ааҕааччылар бүттүүн кэлэктиибинэн сурутан эрэллэр. Холобур, социальнай-реабилитациялыыр киин, улуустааҕы бибилэтиэкэ, үөрэх салалтата, Тулуна орто оскуолатын кэлэктииптэрэ сурутууну бастакынан саҕалаатылар.
Сурутуу салҕанар, кытаатыҥ, улуускут баар-суох соҕотох хаһыатыгар сурутууга көхтөөхтүк кыттыҥ!
Наталья Попова, «Мүрү саһарҕата» хаһыат сүрүн редактора