Быйыл улууспутугар доруобуйа харыстабылыгар, үөрэхтээһин салаатыгар олохтоммут земскэй федеральнай программанан уонна бэйэбит оҕолорбут үөрэхтэрин бүтэрэн дойдуларыгар эдэр исписэлиис буолан биирдиилээн нэһилиэктэргэ ананан таҕыстылар. Кинилэртэн саҥа сиргэ хайдах тэринэн эрэллэрин, олорор усулуобуйаларын, тыа сиригэр үлэлиир туох уратылааҕын туһунан ыйыталастыбыт.
Инна Григорьева, Тулунатааҕы врачебнай амбулатория терапевт бырааһа:
– Бэйэм Дүпсүнтэн төрүттээхпин. Быйылгыттан “Земскэй быраас” федеральнай программанан Тулуна врачебнай амбулаториятыгар терапевынан үлэлии сылдьабын. Тулунаҕа үлэ миэстэтин улуус кылаабынай быраастарын кытта көрсүһүүгэ булан, дьиэ кэргэммин кытта көһөн кэлбиппит. Нэһилиэк дьаһалтата, баһылык Петр Бурнашев олорор дьиэнэн хааччыйан,киинтэн ититиилээх, толору хаччыллыылаах дьиэҕэ олоробут. Коллегаларым куруутун күүс-көмө буолаллар. Арай балыыһабыт эргэ, тымныы, онон саҥа балыыһа дьиэтэ тутуллара буоллар диэн баҕа санаалаахпыт. Оччоҕо үлэлииргэ, олохсуйарга толору, табыгастаах усулуобуйа тэриллиэ этэ. Оттон федеральнай программалар бааллара эдэр исписэлиистэргэ көмө уонна улахан тирэх буолаллар.
Валентина Алексеева, Лөгөйдөөҕү лицей интернат математика, информатика учуутала:
– Мин Кэптэниттэн төрүттээхпин, Лөгөй орто оскуолатын 2021 сыллаахха манна үлэлии кэлиэм диэн баҕа санаалаах бүтэрбитим. ХИФУ математика уонна информатика институтун быйыл бүтэрдим. Бэйэм үөрэммит оскуолам буолан ханнык да программаҕа киирбэккэ, математика уонна информатика учууталын миэстэтэ тахсыбытыгар тута үлэлии кэллим. “Земскэй учуутал” программанан чугас сытар улуустарга үлэҕэ тахсыы улахан куонкурустаах, холобур, уопуттаах дьон быдан элбэх баалы ылаллар. Тыа сиригэр эдэр үлэһит аҕыйах. Ол биир төрүөтүнэн олорор усулуобуйа уустугар сытар дии саныыбын. Оттон мин бэйэм дьиэбэр олорор буолан усулуобуйам үчүгэй. Устудьуоннаабыт кэммэр сыл ахсын практикабын оскуолабар кэлэн барбытым, бэйэм үөрэммит учууталларым уонна оҕолору билэр буоламмын, үлэм этэҥҥэ саҕаланарыгар эрэллээхпин.
Марианна Стрекаловская, Танда орто оскуолатын математика, информатика учуутала:
– Бороҕонтон төрүттээхпин, ХИФУ математика уонна информатика институтугар 4 курска үөрэнэбин. Үөрэҕим биэс сыллаах. Танда оскуолатыгар үлэ миэстэтин пед дьаарбаҥкаҕа сылдьан билсибитим. Бэйэм целевой миэстэнэн үөрэххэ киирбитим, ол иһин эрдэттэн дэриэбинэҕэ үлэлиэм диэн былааннаах этим. Тыа сиригэр ыччат үксэ олорор сирдэрин усулуобуйатын, интернет, сибээс ситимэ мөлтөҕүн уонна суол-иис суоҕун ыарырҕаталлар. Толору хааччыллыы дьиэ аайы суох уонна суол-иис мөлтөх буоллаҕына, хаайтарыы буолар. Мин кыра эрдэхпиттэн Тандаҕа сайылыы тахсар буоламмын, дьиэбэр олоробун, онон миэхэ усулуобуйам барыта баара олус үчүгэй.
Екатерина Захарова