Дьокуускай куоракка атырдьах ыйын чаҕылхай күннэрэ үөрэх эйгэтигэр улахан ситиһиилэри бэлэхтээтилэр. Үөрэх үлэһиттэрин атырдьах ыйынааҕы мунньаҕын чэрчитинэн икки бөдөҥ тэрээһин – «СахаЛето-2026» идэтийбит бэстибээл уонна «Үүнүү-2026» өрөспүүбүлүкэтээҕи быыстапка-күрэс ыытылынна. Бу былаһааккалар оҕону сайыннарыыга педагогическай саҥаны киллэриилэр, оҕо айар дьоҕура уонна үлэнэн иитии холобурдара буоланнар, 2026 сыллааҕы сайыҥҥы доруобуйаны бөҕөргөтөр сезон бэлэмнээҕин үрдүк таһымҥа көрдөрдүлэр.
Атырдьах ыйын 19 күнүгэр өрөспүүбүлүкэ киин куората оҕо сынньалаҥын тэрийээччилэри түмтэ. СӨ Бырабыыталыстыбатын Бэрэссэдээтэлэ Галина Данчикова уонна үөрэх миниистирэ Нюргуна Соколова салалталарынан ааспыт «СахаЛето-2026» бэстибээл дойду бастыҥ эспиэрдэрин муста.
“Тэрээһин сыала-соруга – уопут атастаһыыта уонна 2030 сылга диэри судаарыстыбаннай бэлиитикэ сүнньүнэн оҕо сайыҥҥы сынньалаҥын хаачыстыбатын үрдэтии”, – диэн тэрийээччилэр бэлиэтээтилэр.
Кылаабынай тэрээһиннэринэн бастыҥ педагогическай ньымалар быыстапкалара, этнокултуурунай лааҕырдар күрэстэрэ уонна «Саха сирин бастыҥ баһаатайа» диэн күөн-күрэс буоллулар. Арассыыйа киин эрэгийиэннэриттэн сылдьар ыалдьыттар култуура нөҥүө оҕо кутун-сүрүн харыстааһын ураты методикатын сөҕө-махтайа билистилэр.
Уус Алдан улууһун үөрэх эйгэтин хамаандаларын кыайыылара – улахан киэн туттуубут:
- «Оҕо – култуура киинигэр» номинацияҕа кыайыылааҕынан В.Д. Лонгинов аатынан Бээрийэ орто оскуолатын талааннаах педагогун Нь.В. Атласова үлэтэ – “Туосчут” лааҕыр (оскуола дириэктэр Н.И. Васильева) ааттанна. Тэрийээччи С.Н. Слепцов уонна лааҕыр начаалынньыга М.П. Турантаева сүҥкэн кылааттарын киллэрдилэр;
- Мүрүтээҕи эдэр натуралистар станцияларыттан «Эколята» үөрэтии-чэбдигирдии сайыҥҥы лааҕыра иитии бырагырааматын иһин «Ситиһиилээх кыттыы иһин» дипломунан наҕараадаланна (директор Т.Д. Шамаева).
Сарсыныгар, атырдьах ыйын 20 күнүгэр, Орджоникидзе болуоссата чэлгийэр оҕуруот аһынан, араас дьэрэкээн сибэккинэн туолла. Үөрэх уонна наука министиэристибэтэ уонна «Саха оҕото» Ресурснай киин тэрийбит «Үүнүү-2026» быыстапкаҕа өрөспүүбүлүкэ 28 агрооскуолата кытынна. Бу көннөрү дьаарбаҥка буолбатах, хотугу тыйыс усулуобуйаҕа илиинэн үүннэриллибит экзотическай үүнээйилэртэн саҕалаан бастыҥ хортуоппуйга тиийэ оҕолор сыралаах үлэлэрин көрдөрөр тыыннаах лаборатория буолла.
Айылҕаны кэтээн көрөр эдэр натуралистар станцияларын хамаандата бары хайысхаҕа чаҕылхайдык кыттан маастарыстыбатын итэҕэттэ:
- оҕуруот аһын уонна хортуоппуйу үүннэриигэ – I миэстэ;
- араас уонна отонноох култууралар – II миэстэ;
- экзотическай уонна эмтээх үүнээйилэр – I миэстэ;
- дьэрэкээн үүнээйини олордуу уонна ландшафт дизайна – II миэстэ;
- “Күһүҥҥү баал” – II миэстэ (айылҕа бэлэхтэринэн авангард муода).
Ити курдук кытаанах киирсии түмүгүнэн станция «Үүнүү-2026» өрөспүүбүлүкэтээҕи күрэс муҥутуур кыайыылааҕынан буолла!
Бу атырдьах ыйынааҕы күннэр биһиги тыабыт сирин, үгэстэрбитин уонна научнай сайдыыны кэскиллээх илиигэ – учууталларбыт уонна талааннаах үөрэнээччилэрбит илиилэригэр тутан олорорбутун өссө төгүл бигэргэттилэр.
Светлана Сен-Дун-Шен