Уһун Күөлгэ отчуокка бастакынан ыйытыылаах, этиилээх бөһүөлэк ытык кырдьаҕаһа Иван Бурцев буолла. Кини кэнчээри ыччат сайдыытын түстүүр оскуола дьиэтэ кыараҕаһынан, саҥа таас оскуола тутулларыгар баҕа санаалааҕын эттэ. Итиэннэ дьиэтигэр ититии киирэрин туруоруста.
Бөһүөлэк иһинэн улахан уйуктаах массыыналар сылдьаннар суолу алдьаталларын хайдах да бобор кыахпыт суох, улуус дьаһалтатын таһымыгар быһаарыллара буоллар диэн көрдөһөллөр. «Чуораанчык» оҕо саадын сэбиэдиссэйэ көһө сылдьар санитарнай көрүүнү тэрийэргэ этии киллэрдэ. Онуоха улуус кылаабынай бырааһа: «Көһө сылдьан үлэни Кэптэнигэ уонна Суоттуга оҥороору бэлэмниибит. Онно чугас нэһилиэктэр кэлэн көрдөрүнүөхтэрин сөп. Ол эрээри маммограф аппараата стационарнай эрэ баар. Бу этиини толкуйдуохпут», – диэтэ. Итиэннэ Кэптэнигэ стоматолог бырааһы үлэлэтэри эмиэ этии быһыытынан боротокуоллаттылар.
Ынах төбөтүгэр бэриллэр харчы олус көмөлөөҕүн этэн туран, уруккунан ылар ордугун ыйаллар. «Суол көннөрүллүбэтэҕэ ыраатта, охсуу ханан баарын суоппардарбыт билэр эрэ буоланнар, этэҥҥэ сылдьаллар», – дииллэр.
Түмүккэ «улууска сэргэхсийии барбытын бэлиэтии көрдүбүт, отчуот сыыппаранан көрдөрүүлэрэ үчүгэйдэр» диэн хайҕаатылар. Онон отчуоттуур бөлөх үлэ күнүн «үчүгэй» диэн сыаналаах түмүктээтэ.
Ольга Шепелева