Тустаах үлэһиттэр субуотунньукка сылдьалларынан, олохтоохтортон ыйыталаһан билбиппинэн, Радиотумул түөлбэ илин өттүгэр «Армон» ХЭТ бас билиитигэр үлэлиир хочуолунайга бэҕэһээ күнүс 3 чаас диэки носуоһу өрөмүөннүүбүт диэн ититиини тохтоторго күһэллибиттэр.
Өрөмүөн кыайтарымна, ититиини киэһэ хойутуу 10 чаас диэки биэрэ сатаабыттар даҕаны, оһох дабылыанньата тахсан быстыбатах. Ититии уопсай ситимэ кэмигэр сылыйбыт эрээри, Тарскай аатынан уулуссаҕа сэттэ ыал тэлгэһэтин иһинээҕи турбата тоҥмут. Бу ыалларга ититии киирбэккэ, дьиэлэр тоҥнулар, дьиэлээхтэр бөөлүүн харахтарын симэн да көрбөтөхтөр. Ону сэргэ Никифоров аатынан уулуссаҕа биир ыал оһоҕо тоҥон хайа барбыт сураҕа иһилиннэ.
Инньэ гынан, түүн 1-2 чаастан түрүлүөн тахсан, эр дьон субуотунньукка туруммуттар. Билигин улуус уонна Мүрү нэһилиэгин дьаһалтатын үлэһиттэрэ, «Армон» ХЭТ уонна улуустааҕы ДьУоКХ тэрилтэтиттэн биригээдэлэр кэлэн субуотунньуктаан үлэлии сылдьаллар.
Дьиэлэр сылыйан эрэллэр эрээри, саамай итийбит дьиэ кыраадыһа 20-тэн тахса илик. Салгыы, биллэрэн иһиэхпит.
Мария АРГУНОВА