Ыттарбыт үөрдүһэр кэмнэрэ эмиэ тиийэн кэллэ. Бу күннэргэ Чульмаҥҥа буолбут иэдээн түбэлтэ хас биирдии киһи сүрэҕин аймаабыт буолуохтаах. Онно 12 саастаах кыыс оҕоҕо үөр ыт саба түһэн, кыл түгэн иһигэр тырыта тыытаннар сырдык тыына быһынна. Бу курдук ыар түбэлтэ ханна да кэмиттэн-кэмигэр тахса турар. Маннык быһылаан таҕыстаҕына киһи ордук тулатын көрүнэр, дьаарханар, куттанар.
Биһиги улууспутугар бэйдиэ ыттары тутуу, көрүү-харайыы боппуруоһа, балаһыанньа хайдаҕый?
Улуустааҕы ветеринарнай станция ООВМ отделын сэбиэдиссэйэ Ирина Машникова иһитиннэрбитинэн, бу дьыл от ыйын 1-кы күнүнээҕи көрдөрүүтүнэн, улуус үрдүнэн 1521 ыт регистрацияламмыт, ол иһигэр Мүрү нэһилиэгэр 260 ыт баара бэлиэтэммит.
Улууспут киинигэр бэйдиэ сылдьар ыты быстах кэмҥэ тутар пуун (приют для собак) баар, манна билигин төһө ыт хааллан сытарын туоһуласпыппар Мүрү нэһилиэгин дьаһалтатын хаһаайыстыбаннай чааһыгар исписэлииһэ Алексей Васильев маннык иһитиннэрдэ:
-
Бэйдиэ сылдьар ыттары тутар приютка билигин ирдэбил быһыытынан өрөмүөн оҥоһулла турар. Муостата бетоннаннар, килиэккэлэрэ саҥардыллаллар, таһырдьааҥҥы килиэккэ муосталанар. Приют барыта 28 миэстэлээх. Бу күннэргэ өрөмүөн үлэтэ түмүктэннэр эрэ, бэйдиэ сылдьар ыттары тутан саҕалыахпыт.
Оттон ыкка ытыттаран “Суһал көмө” сулууспатыгар көрдөрүү хайдаҕый?
Уус Алданнааҕы киин балыыһа суһал көмөҕө салаатын сэбиэдиссэйэ Индира Захарова иһитиннэрбитинэн, быйыл ыам ыйыгар уонна бэс ыйыгар икки киһи ыкка ытыттаран “Суһал көмө” сулууспатыгар көрдөрүммүт. Бу 2009 уонна 1954 сыллаах төрүөх дьон, дьолго, чэпчэки истиэпэннээх эчэйиини ылбыттар.
Бэйдиэ ыттар дэлэйбэттэрин туһугар ветеринарнай сулууспа өттүттэн стерилизация, кастрация, вакцинация оҥоһуллар. Мүрү нэһилиэгин дьаһалтата сыл ахсын рейдэ оҥорон, сэрэтии үлэтин ыытар, төһө кыалларынан бэйдиэ ыттары приютка тутар. Онон улууспут киинин ылан көрдөххө, кэнники кэмҥэ үөрүнэн сылдьар ыт биллэрдик аҕыйаабыт курдук. Оттон дьон иитэр кыылыгар эппиэтинэһи ылынан эрэр дуу диэн эрэх-турах санаа үөскүөҕүн, биирдиилээн бэйдиэ сылдьар ыттар син биир бааллар.
Салгыы Мүрү нэһилиэгин олохтоохторун санаалара.
Александра Константинова, «Маяк» түөлбэ олохтооҕо:
-
Чуолаан мин уулуссабар (40 лет Победы) ытын босхо ыытар киһи суох, бары баайаллар. Бу саас нэһилиэк иһигэр үөрүнэн сылдьар ыт аҕыйаабытын бэлиэтии көрбүтүм. Ол эрээри, оскуола, оҕо тэрилтэтин диэки син биир көстөллөр. Дьиҥэр, бу үөрэх тэрилтэлэрин аттыгар ыт букатын суох буолуохтаах буоллаҕа. Ыттар оҕолору батыһан кэлэллэр. Онон хас биирдии киһи иитэр ыта дьоҥҥо кутталы суоһаппатын туһугар ытын баайыан наада, ону өйдүүр да кэм кэллэ. Ыппыт ытырбат диир дьон баар буолааччылар. Ытырбат да буоллаҕына, уулуссаҕа киһи ыттан сэрэнэн чугуруннуу сылдьара соччото суох буоллаҕа уонна үөргэ киирдэҕинэ, син биир кутталы суоһатар.
Надежда Протодьякнова, «Радиотумул» түөлбэ олохтооҕо:
-
«Радиотумулга» босхо сылдьар ыт олус элбэх. Үгүстэрэ ошейниктаахтар. Онон дьон ытын олох баайбата көстөр, дьиксиннэрэр. “Хайдах бу ыал оҕотун, дьон олоҕун, доруобуйатын туһугар эппиэтинэстэрин өйдөөбөт дьонуй?” диэх санаа киирэр. Сорохтор баайаллар эрээри түүн ыытан кэбиһэллэр. Ол сарсыарда эрдэ оҕолор оскуолаҕа, уһуйааҥҥа баралларыгар-кэлэллэригэр кутталы үөскэтэр дии саныыбын.
Дьэ, ити курдук. Бука бары эппиэтинэстээх буолуохха, иитэр кыылбыт дьоҥҥо кутталы үөскэппэтин туһугар бэйэбит өттүбүтүттэн кыаллары оҥоруохтаахпытын куруук өйдүү сылдьыахха. Оттон, Мүрү нэһилиэгин олохтоохторо, бэйдиэ сылдьар эбэтэр үөр ыты көрдөххүтүнэ, тута 8-924-765-38-90 нүөмэргэ биллэрэр буолуҥ.
Мария АРГУНОВА
Хаартыска интернет ситимиттэн